વાંચો, આ સપ્તાહે આપના ગ્રહોનું ફળકથન...
• મેષ (અ,લ,ઇ)ઃ સપ્તાહ દરમિયાન ગ્રહની સ્થિતિ અનુકૂળ બની રહેશે. લાંબા સમયથી નક્કી કરેલા ધ્યેય ઉપર કામ કરવા માટે ઉત્તમ સમય. ઈચ્છા મુજબના લાભ અને પરિણામો મળે એવા યોગ છે. દરેક સમસ્યાઓનો શાંતિથી ઉકેલ લાવવાનો પ્રયત્ન કરજો. આર્થિક રીતે સમય સાનુકૂળતા વધારે તેવો છે. નોકરી-વ્યવસાયના કાર્યોમાં પારદર્શિતા તેમજ પ્રામાણિકતા દ્વારા કામગીરી કરવી ફાયદાકારક રહેશે. સ્વાસ્થ્યને લઈને થોડીઘણી ચિંતા જોવા મળે. વિદ્યાર્થીઓ માટે આ સમય થોડો કપરો રહેશે.
• વૃષભ (બ,વ,ઉ)ઃ આ સપ્તાહે ગમેતેવી જટીલ સમસ્યા આવે, પણ હિંમત હારશો નહીં તો ફાવશો. મિલકત સંબંધિત વિવાદોનો ઉકેલ લાવવા માટે કોઈ યોગ્ય વ્યક્તિની સલાહથી કામ કરજો. અનુભવી વ્યક્તિની સલાહ તમારા દરેક કાર્યોને સાનુકૂળ બનાવશે. નાણાકીય બાબતોના નિર્ણય થોડા ધ્યાનથી અને સમજીવિચારીને લેવા સલાહ રહેશે. વ્યવસાયમાં ભાગીદારી થકી ફાયદો થાય. જોકે થોડું સમજીને આગળ વધજો. નોકરિયાત વર્ગને સહકર્મચારી સાથેના સંબંધો સુધારવા માટે પ્રયત્નો ચાલુ રાખવા જરૂરી. અંગત સંબંધોમાં પણ સુધારા લાવવા માટેની પહેલ તમારે જ કરવી પડશે.
• મિથુન (ક,છ,ઘ)ઃ આ સમયમાં વ્યવસાયિક કારભારમાં વધારો જોવા મળશે. નોકરી કે કાર્ય સંબંધિત કામગીરીનું ભારણ વધતું જોવા મળશે. જોકે સામે આર્થિક ફાયદા પણ જોઈ શકશો. વિદ્યાર્થીઓ માટે આ સમય દરમિયાન થોડું વધુ ધ્યાન કેન્દ્રિત કરવું આવશ્યક રહેશે. યાત્રાપ્રવાસની ઈચ્છા સાકાર થતી જોવા મળશે. સ્વાસ્થ્યને લઈને થોડીઘણી કાળજી અવશ્ય લેજો. બિનજરૂરી ખર્ચાઓ ઉપર નિયંત્રણ રાખશો તો ફાયદામાં રહેશો. સંતાનોની સમસ્યાનું નિરાકરણ આવતું જોવા મળશે.
• કર્ક (ડ,હ)ઃ આ સમય આપના માટે ખુશી અને આનંદમાં પસાર થતો જોવા મળશે. કોઈ વગદાર વ્યક્તિઓ સાથે સમય વિતાવવાનો મોકો મળશે, જેનો ભરપૂર લાભ ઉઠાવી શકશો. માંગલિક કાર્યોમાં પણ ભાગ લઈ શકશો. આર્થિક સમસ્યાઓનો ઉકેલ લાવવા માટેના તમારા પ્રયત્નો સાકાર થતા જોવા મળશે. વ્યવસાય કે નોકરીમાં કોઈ પણ પ્રકારના જોખમ લેવાનું ટાળજો. જે કાર્યો હાથ પર લીધા છે એને પહેલાં પૂર્ણ કરવા પર ધ્યાન આપવું જરૂરી રહેશે. ઘર અને કામ વચ્ચે સંતુલન જાળવી રાખવું અગત્યનું રહેશે.
• સિંહ (મ,ટ): સપ્તાહની શરૂઆત સકારાત્મક જણાય. તમારા અંગત કાર્યોને પૂરો કરવા માટે સમય આપી શકશો. રાજકીય કામગીરી કરતાં લોકોને આગળ વધવા માટે સારી તકો મળશે. નાણાકીય બાબતોમાં થોડીઘણી સમસ્યા આવશે, પરંતુ તમારી સૂઝબૂઝથી હલ મેળવી શકશો. વ્યવસાયિક રીતે નવા સોપાન સર થાય એવી તક મળશે. નોકરિયાત વર્ગ લાંબા સમયથી અટકેલી કામગીરી આગળ વધારી શકશે. પરિવારના સભ્યો સાથે મોજમસ્તીવાળો સમય પસાર થાય. વિદ્યાર્થીઓને કોઈ શુભ સમાચાર મળશે.
• કન્યા (પ,ઠ,ણ)ઃ આ સમયમાં વણઉકેલ્યા કાર્યો તરફ થોડું વધુ ધ્યાન આપી એને પૂર્ણ કરવા પર ધ્યાન આપવું જરૂરી છે. વ્યવસાય-નોકરીમાં યોગ્ય તકનો લાભ ઉઠાવવાનું ચૂકતા નહીં. તમારા અંગત જીવનના તણાવ - સમસ્યાને કામ પર હાવી થવા દેવા દેશો નહીં. આવકના નવા સ્ત્રોત ઊભા કરવાના પ્રયત્નો પરિપૂર્ણ થતા જોઈ શકશો. જીવનસાથી સાથે યોગ્ય સુમેળ બનાવી રાખવાના પ્રયત્નો સફળ થાય. નાના પ્રવાસનું પણ આયોજન કરી શકો છો. વિદ્યાર્થીઓને પરીક્ષાને લઈને થોડું ભારણ જોવા મળશે.
• તુલા (ર,ત)ઃ કોઈ પણ કામગીરીમાં ભાવુકતાના બદલે સમજીવિચારીને કાર્ય કરશો તો સફળતા મેળવશો. આર્થિક રીતે સમય હવે બદલાતો જોઈ શકશો. નવી આવકના સાધનો ઊભા કરવામાં સફળ થશો. બાકી લેણાં પણ પરત મેળવી શકશો. વ્યવસાય ક્ષેત્રે કોઈ નવા ઓર્ડર અથવા પ્રોજ્ક્ટસ પર કામગીરી શરૂ કરી શકાય. તમારું કૌશલ્ય અને કુશળતા દેખાડવા માટે ઉત્તમ તક છે. બિનજરૂરી વાદવિવાદથી દૂર રહેવું સલાહનીય રહેશે. નોકરીમાં જગ્યાની ફેરબદલી અથવા તો પરિસ્થિતિને અનુકૂળ બદલાવની જરૂરિયાત રહેશે. બિનજરૂરી ખર્ચથી પણ દૂર રહેવું લાભકારી રહેશે.
• વૃશ્ચિક (ન,ય)ઃ વ્યવસાયિક રીતે આ સમયમાં ઘણી સારી નવી ઓફર મેળવી શકશો. સ્પર્ધાત્મક કામગીરી દ્વારા તમારી આવડત અને કુશળતા બતાવી સારા પરિણામ પ્રાપ્ત કરી શકાય. આર્થિક રીતે આ સમયમાં ઘણાં લાભ મેળવી શકશો. જોકે અહીં એક વાતનું ખાસ ધ્યાન રાખશો કે તમારી બેદરકારી તમને જ નુકસાન પહોંચાડી શકે છે. નોકરીમાં પરસ્પર સંબંધોમાં નિખાલસ તેમજ પારદર્શિતા રાખશો તો કાર્ય સારી રીતે કરી શકશો. પરિવાર સાથે પણ સાનુકૂળ સમય વિતાવી શકશો. સ્વાસ્થ્યને લઈને થોડીઘણી ચિંતા રહેશે. કોર્ટકચેરીના કાર્યોમાં વિજય મેળવી શકશો.
• ધન (ભ,ફ,ધ,ઢ)ઃ જીવનના દરેક કાર્યોમાં શિસ્ત તેમજ અનુશાસન જરૂરી છે તે ધ્યાનમાં રાખશો તો ફાવશો. વ્યવસાય અને નોકરીના સ્થાનમાં કેટલાક સુધારા તેમજ ફેરફારની જરૂર રહેશે. વિદ્યાર્થીઓ અને યુવા વર્ગે સમજદારી તેમજ મહેનતથી કામગીરી કરવાની જરૂર રહેશે. સામાજિક-આધ્યાત્મિક કામગીરીમાં સામેલ થશો. કોઈ જૂના મિત્ર સાથે આકસ્મિક મુલાકાત ઉર્જાનો સંચાર કરશે. સ્વાસ્થ્યને લઈને આપની બેદરકારી હવે દૂર કરવી પડશે. થોડી કસરત તેમજ ખાનપાનમાં કાળજી જરૂરી રહેશે.
• મકર (ખ,જ)ઃ નકારાત્મક વિચારોને દૂર કરી સકારાત્મક વિચારો પર ધ્યાન કેન્દ્રિત કરી કામ કરવાથી ફાયદો રહેશે. જૂના અને જટિલ પ્રયત્નોનો ઉકેલ લાવવા વિચારસરણીમાં થોડોક બદલાવ જરૂરી રહેશે. તમારા સંબંધોનો કાર્યમાં ઉપયોગ કરીને સકારાત્મક પરિણામ મેળવી શકશો. પૈસાની લેવડદેવડમાં કોઈ યોગ્ય વ્યક્તિને વચ્ચે રાખી કામગીરી કરવી હિતાવહ રહેશે. નાનામાં નાની બાબતોની ચોકસાઈ રાખી કામ કરવું નહીં તો ઉલમાંથી ચૂલમાં પડવાનો સમય દૂર નથી. વ્યવસાયિક કામગીરીમાં પણ જવાબદારી એકબીજા ઉપર વહેંચીને કામ કરવામાં ફાયદો રહેશે.
• કુંભ (ગ,શ,સ,ષ)ઃ આ સમય વ્યસ્તતાપૂર્ણ પસાર થાય. કામગીરીનું ભારણ તેમજ જવાબદારીનું ભારણ વધતું જોવા મળશે. તમારા મહત્ત્વપૂર્ણ કાર્યોને પૂરા કરવા માટે આ યોગ્ય સમય છે. વ્યક્તિગત કામગીરી સાથે સાથે સામાજિક તેમજ કૌટુંબિક પ્રવૃત્તિને પણ એટલું જ મહત્ત્વ આપવું પડશે. આર્થિક લેવડદેવડના કાર્યોમાં તેમજ ભાગીદારીના કાર્યોમાં બમણી ચોકસાઈ રાખી કામગીરી કરવી જરૂરી છે. પરિવાર તેમજ બાળકો સાથે આનંદિત સમય પસાર કરી શકશો. માતાપિતાના સ્વાસ્થ્ય સંબંધી ચિંતાઓ હવે દૂર થાય.
• મીન (દ,ચ,ઝ,થ)ઃ આ સમયમાં સ્થાનફેરના યોગ બળવાન બને છે, પછી એ નોકરી-વ્યવસાય કે અંગત રીતે પણ હોઈ શકે. તમારી લાગણી અને ઉદારતા જ તમારી સૌથી મોટી નબળાઈ બની શકે છે, જેનું ખાસ ધ્યાન રાખવું. વ્યવસાય-નોકરીના કાર્યોમાં ખૂબ મહેનત માંગી લેતો સમય. નવાં રોકાણ કરતાં પહેલાં સંશોધન જરૂરી રહેશે. નાણાકીય સ્થિતિ વધુ મજબૂત બનતી જોઈ શકશો. વિદ્યાર્થીઓને પણ મહેનતનું સારું પરિણામ પ્રાપ્ત થાય. બદલાતા હવામાનને કારણે થોડી શારીરિક સમસ્યા જોવા મળશે.
