થાણેઃ સ્પેશ્યલ કોર્ટે રૂ. ૨,૫૦૦ કરોડના મેથાફેટામાઇન ડ્રગ કેસમાં બોલિવૂડ અભિનેત્રી મમતા કુલકર્ણી અને તેના કથિત પતિ ઇન્ટરનેશનલ ડ્રગ માફિયા વિજયગીરી ઉર્ફે વિકી ગોસ્વામી વિરુદ્ધ બિનજામીનપાત્ર વોરંટ બહાર પાડયું છે. સ્પેશ્યલ કોર્ટે સોમવારે આ બંને માટે નોનબેલેબલ વોરંટ જારી કર્યું હતું. વોરંટ બહાર પાડવામાં આવતાં આ કેસના તપાસકર્તાઓના પ્રયત્નોને આખરે સફળતા મળી છે. તપાસકર્તાઓએ એવો દાવો કર્યો છે કે તેમની પાસે મમતા અને વિકી આ બંને વિરુદ્ધ નક્કર પુરાવા છે જેના આધારે બંને વિરુદ્ધ ચાર્જશીટ પણ તેઓ દાખલ કરવા માગે છે. જોકે ડ્રગ કેસમાં આ બંનેનું નામ સંડોવાયું ત્યારથી આ બંને ગાયબ છે. તેથી બંનેને ફરાર જાહેર કરાયા છે તેવું ભારતીય પોલીસે જણાવ્યું છે.
બંને મુખ્ય સૂત્રધાર
આ કેસમાં ધરપકડ કરાયેલા આરોપીની પૂછપરછ કરતાં આરોપીએ જણાવ્યું કે ગોસ્વામી અને કુલકર્ણી મુખ્ય સૂત્રધાર છે. બંનેએ ડ્રગ્સ બનાવવા-તેની હેરાફેરી માટેનું આખું સામ્રાજ્ય ઊભું કર્યું છે. એફેડ્રાઇન ડ્રગ બનાવવા માટેનો કાચો માલ ભારતથી લાવવાથી માંડીને કેન્યામાં મેથાફેટામાઇન તૈયાર કરવા અને તેને બહાર મોકલવા માટેની બધી વ્યવસ્થા આ બંનેએ કરી હોવાનું આરોપીએ તપાસકર્તાઓને જણાવ્યું હતું.
