લંડનઃ ભારતના આસામ રાજ્યના મુખ્યમંત્રી હિમંતા બિસ્વા સરમાએ દાવો કર્યો છે કે બ્રિટિશ વડાપ્રધાન રિશી સુનાક અને તેમના પત્ની અક્ષતા મૂર્તિ હિન્દીને ઘણું મહત્વ આપે છે અને તેમના સંતાનો હિન્દી શીખ્યાં છે. શનિવારે રાત્રે જી-20 ડીનર ખાતે મારે આ મામલે સુનાક સાથે વાત થઇ હતી.
પત્રકારો સાથેની વાતચીતમાં સરમાએ જણાવ્યું હતું કે, મારે બ્રિટિશ વડાપ્રધાન રિશી સુનાક અને તેમના પત્ની સાથે થોડી વાતચીત થઇ હતી. તેમણે મને જણાવ્યું હતું કે, અમે બ્રિટનમાં રહેતાં હોવા છતાં અમારા સંતાનોને હિન્દીનું શિક્ષણ આપ્યું છે. વડાપ્રધાન સુનાકે આ વાત કેટલાક મુખ્યમંત્રીઓની સામે કહી હતી. તે સમયે હું વિચારમાં પડી ગયો હતો કે ભારતમાં રહેતા હોવા છતાં હું મારા સંતાનોને હિન્દી શીખવા માટે મહત્વ આપતો નથી પરંતુ તેઓ ઇંગ્લેન્ડમાં રહીને આ કામ કરી રહ્યાં છે જે અદ્વિતિય છે.
