લંડનઃ આર્કટિક સર્કલમાં ૨૦૧૬માં ભારતનો તિરંગો લહેરાવનારા પ્રથમ ભારતીય મહિલ ભારુલતા કાંબલે આ વર્ષે ભારતાના ૭૦મા સ્વાતંત્ર્ય દિનની ઉજવણી નિમિત્તે ગ્રેટ બ્રિટનના છેડાના બે વિસ્તારો ( સાઉથવેસ્ટ, લેન્ડ્સ એન્ડ અને નોર્થઈસ્ટ જહોન ઓ ગ્રોટ્સ) વચ્ચેનો સોલો કાર પ્રવાસ કરીને ભારતનો રાષ્ટ્રધ્વજ ફરકાવશે. આ રૂટ પર સોલો કાર પ્રવાસ કરનારા તેઓ પ્રથમ મહિલા બનશે.
કાંબલેનો આ પ્રવાસ લેન્ડ્સ એન્ડ અને નોર્થઈસ્ટ જહોન ઓ ગ્રોટ્સમાં સ્વાતંત્ર્ય દિનની ઉજવણીની સાથે 'બેટી બચાઓ, બેટી પઢાઓ' અભિયાન વિશે જાગૃતિ ફેલાવવાનો પણ છે. કાંબલેએ જણાવ્યું હતું,' NRI આ અભિયાન માટે બ્રાન્ડ એમ્બેસેડર બને અને કન્યા કેળવણીને પ્રોત્સાહન આપવા માટે ભારત તથા અન્ય દેશોમાં વસતા તેમના પરિચિતોમાં તેના માટે જાગૃતિ કેળવે અને સક્રિય બનાવે તેવો આ ઈવેન્ટનો હેતુ છે.'
કાંબલે ૧૫મી ઓગસ્ટે બ્રેન્ટ ઈન્ડિયન એસોસિએશન, વેમ્બલીથી નીકળીને ૫૫૦ કિ.મી.નું અંતર કાપીને લેન્ડ્સ એન્ડ પહોંચશે અને ત્યાં ભારતનો રાષ્ટ્રધ્વજ ફરકાવશે. તા.૧૬ મીએ તેઓ ત્યાંથી નીકળીને ૧૪૦૦ કિ.મી.નું અંતર કાપીને બીજા દિવસે જહોન ઓ ગ્રોટ્સ પહોંચશે અને ત્યાં પણ તિરંગો લહેરાવશે. આ બન્ને સ્થળો પર ભારતનો ધ્વજ પ્રથમ વખત ફરકશે.
પ્રવાસ દરમિયાન તેઓ કન્યાઓ માટેના અનાથાશ્રમનું સંચાલન કરતી સંસ્થા હંસરાજ ચીલ્ડ્રન હોમ માટે ફંડ રેઝિંગ પણ કરશે.
