મેં અને અર્જુને લગ્ન અને બાળકો વિશે ચર્ચા કરી લીધી છે: મલાઈકા

મલાઈકા અરોરા હંમેશા તેના બિન્દાસ અંદાજના કારણે ચર્ચામાં હોય છે. ડિવોર્સ બાદ પતિ અરબાઝની વાત હોય કે તેના બોયફ્રેન્ડ અર્જુન કપૂરની વાત તે તેના જીવનની કોઈ પણ ઘટનાને સિક્રેટ રાખવામાં માનતી નથી. તાજેતરમાં, ઓટીટી પર રિલીઝ થયેલી તેની સિરીઝ ‘મૂવિંગ ઈન વિથ મલાઈકા’ના પહેલા એપિસોડમાં તેણે તેની પર્સનલ લાઈફ વિશે અનેક ખુલાસા કર્યા હતા. ફિલ્મમેકર-કોરિયોગ્રાફર ફરાહ ખાન સાથે વાત કરતાં તેણે જણાવ્યું હતું કે, અર્જુન અને હું અમારા મેરેજ અને બાળકોના પ્લાન વિશે ચર્ચા કરી ચૂક્યા છીએ.
મલાઈકાએ જણાવ્યું હતું કે, હું ખુશ રહેવામાં માનું છું. રિલેશનશીપમાં હું મારા તરફથી બેસ્ટ કોન્ટ્રીબ્યુશન આપું છું. આજે જે વ્યક્તિ મારા જીવનમાં છે તે મને ખુશ રાખે છે તો હું તેની ખુશી વિશે પણ વિચારું છું. અમે અનેક વાતો વિશે ચર્ચા કરીએ છીએ. અર્જુન અને હું લગ્ન અને બાળકો વિશે વાત કરતાં રહીએ છીએ. અમને ઠીક લાગશે તે સમયે અમે પરણી જશું. દુનિયા શું વિચારશે તેના વિશે હું કોઈ દિવસ નથી વિચારતી અને મને તેનાથી કોઈ ફરક પણ નથી પડતો.’
મલાઈકા અને અરબાઝ 18 વર્ષના લગ્નજીવન બાદ છૂટા પડ્યા છે. એક્સ હસબન્ડ અરબાઝ ખાન વિશે તે કહે છે જયારે મારા લગ્ન થયા હતા ત્યારે હું ખૂબ જ નાની હતી. હું જીવનમાં નવા અનુભવ ઈચ્છતી હતી. મને લાગે છે કે, અત્યારે હું જે સ્ટેજ પાર છું ત્યાં ખુશ છું. મારા અને અરબાઝ વચ્ચે ફિલ્મ ‘દબંગ’ની રિલીઝ સુધી બધું બરાબર હતું પરંતુ, ‘દબંગ’ રિલીઝ થયા બાદ અચાનક અમારા સંબંધોમાં કડવાશ આવી ગઈ અને એકબીજાની વાતોથી ચીડ થતી હતી અને અમારા દરેક ઓપિનિયન અલગ પડી રહ્યા હતા.