સુષ્મિતા સેન રોહમન સાથે જોવા મળી! લલિત મોદીને પડતા મૂક્યા કે શું?

ક્રિકેટવિશ્વની સૌથી સફળ ટૂર્નામેન્ટ આઈપીએલના સ્થાપક કમિશનર લલિત મોદીએ ભૂતપૂર્વ વિશ્વસુંદરી અને એકટ્રેસ સુસ્મિતા સેન સાથે પોતે ડેટિંગ કરી રહ્યા હોવાનું જાહેર કરીને હલચલ મચાવી દીધી હતી. જોકે, લલિત મોદીની આ સનસનાટી સર્જતી જાહેરાત અંગે કોઈ સત્તાવાર પ્રતિભાવ નહીં આપનારી સુસ્મિતાએ ફરી એક્સ બોયફ્રેન્ડ રોહમન શોલ સાથે હળવા-મળવાનું શરૂ કરતાં તરેહ તરેહની અટકળો શરૂ થઇ છે. તાજેતરમાં સુસ્મિતાના માતા શુભ્રા સેનના બર્થ ડે નિમિત્તે પાર્ટી યોજવામાં આવી હતી. તેમાં સુસ્મિતાની દીકરીઓ રીની - આલિશા અને અન્ય પરિવારજનો પણ હાજર હતાં. આ પાર્ટીમાં રોહમન પણ હાજર હોવાનું ખુદ સુસ્મિતાએ પોસ્ટ કરેલા વીડિયોમાં જોવા મળે છે. વીડિયો પરથી ખ્યાલ આવે છે કે રોહમન માત્ર સુસ્મિતા જ નહીં, પરંતુ સમગ્ર પરિવાર સાથે નિકટતા ધરાવે છે.
આ પછી 'લાલ સિંહ ચઢ્ઢા'નો પ્રિમિયર શોમાં સુસ્મિતા અને રોહમન સાથે સાથે આવ્યાં હતાં. રોહમન ત્યારે પણ સુસ્મિતાની બંને દીકરીઓ સાથે એકદમ આત્મીયતાથી હળતોભળતો હોવાનું જોવા મળ્યું હતું. સુસ્મિતા - રોહમન અગાઉ બ્રેકઅપ જાહેર કરી ચૂક્યાં છે. જોકે, તેમણે એમ પણ જણાવ્યું હતું કે બંને સારાં મિત્રો તરીકે યથાવત્ રહેશે. હવે બન્ને માત્ર ‘સારાં મિત્ર’ જ કે ‘ખાસ મિત્ર’ છે એ તો સમય જ કહેશે.