વિક્રમ દોરાઈસ્વામી યુકેમાં ભારતીય હાઈ કમિશનર તરીકે કાર્યભાર સંભાળે તેવી સંભાવના

લંડનઃ બાંગ્લાદેશમાં ભારતીય રાજદૂત વિક્રમ દોરાઈસ્વામી યુનાઈટેડ કિંગડમમાં ભારતીય હાઈ કમિશનર તરીકે કાર્યભાર સંભાળે તેવી સંભાવના છે. 1992 બેચના ભારતીય વિદેશ સેવાના અધિકારી, દોરાઈસ્વામીએ ઉઝબેકિસ્તાન, સાઉથ કોરિયામાં ભારતીય રાજદૂત અને યુએસમાં વડા પ્રધાનના ખાનગી સચિવ તરીકે સેવા આપી છે. હાલ સત્તાવાર જાહેરાત થઈ નથી. જો પુષ્ટિ થાય તો, દોરાઈસ્વામી યુનાઈટેડ કિંગડમના સૌથી યુવા હાઈ કમિશનરો પૈકી એક હશે.
આ મહિને કેટલાક અન્ય નવા ભારતીય ડિપ્લોમેટ્સની પોસ્ટિંગ પણ થવાની છે. ભૂટાનમાં ભારતના રાજદૂત રુચિરા કંબોજ સંયુક્ત રાષ્ટ્રમાં કાયમી પ્રતિનિધિ તરીકે પદ સંભાળવાના છે. એવી અટકળો છે કે વિયેતનામમાં ભારતીય રાજદૂત પ્રણય વર્મા ભૂટાનમાં રૂચિરા કંબોજનું સ્થાન લેશે અને સંદીપ આર્ય હનોઈમાં તેમનું સ્થાન લેશે. જાપાનમાં ભારતના રાજદૂત સંજય કુમાર વર્મા કેનેડામાં આગામી હાઈ કમિશનર તરીકે કાર્યભાર સંભાળશે, કારણ કે ભારતના વિદાય લઇ રહેલા હાઈ કમિશનર અજય બિસારિયા નિવૃત્ત થયા છે. જ્યારે ન્યૂ યોર્કમાં તિરુમૂર્તિ અને લંડનમાં ગાયત્રી ઈસાર કુમાર, બંને જૂનના અંતમાં નિવૃત્ત થયા છે.
દરમિયાન, વિદેશ મંત્રાલય (MEA) એ જાહેરાત કરી છે કે કેન્યામાં ભારતના હાઈ કમિશનર વીરેન્દ્ર કુમાર પોલ હવે તુર્કીમાં આગામી રાજદૂત હશે અને વિશ્વાસ વિદુ સપકલ, સંયુક્ત સચિવ (દક્ષિણ) હવે પેરુના આગામી રાજદૂત હશે. થિમ્ફુ અને ઢાકાના આગામી રાજદૂતોને અંતિમ સ્વરૂપ આપવાનું બાકી છે પણ વોશિંગ્ટનમાં ભારતના ડેપ્યુટી ચીફ ઓફ મિશન, સુધાકર દાલેલા બાંગ્લાદેશમાં ભારતીય હાઈ કમિશનર તરીકે કાર્યભાર સંભાળે તેવી સંભાવના છે.
વિક્રમ દોરાઈસ્વામીઃ મહેનતુ રાજદ્વારી
દોરાઈસ્વામીની નિમણુંક ભારતમાં તેમના સમકક્ષ યુકેના હાઈ કમિશનર એલેક્સ એલિસ સાથે મેળ ખાશે, જેઓ પણ તેમના પુરોગામી કરતાં નાની વયના છે અને આ વર્ષે મુક્ત વેપાર કરાર પૂર્ણ કરવામાં ચાવીરૂપ બનશે. દોરાઈસ્વામી એક પ્રોફેશનલ અને મહેનતુ રાજદ્વારીની છાપ ધરાવે છે. સાઉથ કોરિયામાં ભારતીય રાજદૂત તરીકે દોરાઈસ્વામી ભારતમાં KIA મોટર્સ લાવવા અને ભારતમાં સ્વ-સંચાલિત હોવિત્ઝરના સંયુક્ત વિકાસ માટેના મુખ્ય અધિકારીઓમાંના એક હતા.

------

પેઢીઓના માર્ગદર્શક, રાજદ્વારી સતીન્દર કુમાર લાંબાનું 81 વર્ષની વયે નિધન

વરિષ્ઠ રાજદ્વારી સતીન્દર કુમાર લાંબા, જેમણે પાકિસ્તાન સાથે ભારતની બેક-ચેનલ વાટાઘાટોમાં મુખ્ય ભૂમિકા ભજવી હતી અને જેઓ કાશ્મીર પર બંને પક્ષોને સંમતિની નજીક લઈ ગયા હતા, ગુરુવારે રાત્રે નવી દિલ્હીમાં લાંબી માંદગી બાદ તેમનું નિધન થયું છે. તેઓ 81 વર્ષના હતા.
પાકિસ્તાન, અફઘાનિસ્તાન અને રશિયા સાથેના સંબંધોને ઘડવામાં મદદ કરનાર નિપુણ અધિકારી લામ્બાએ 2001-2004 દરમિયાન વડા પ્રધાન અટલ બિહારી વાજપેયીના નેતૃત્વમાં અફઘાનિસ્તાન માટે વિશેષ દૂત તરીકે સેવા આપી હતી અને 2005માં વડા પ્રધાન મનમોહન સિંઘના નેતૃત્વ હેઠળ પણ વિશેષ દૂત હતા. આ વિવિધ રાજકીય વ્યવસ્થાપન સાથે કામ કરવાની તેમની ક્ષમતાનું પ્રતિબિંબ હતું.
મજબૂત કારકિર્દીમાં તેઓ એ ટીમના ભાગ હતા જેણે 1971માં બાંગ્લાદેશની રચના પછી ઢાકામાં નવા ભારતીય મિશનની શરૂઆત કરી હતી. લામ્બાએ તાલિબાન શાસનની હકાલપટ્ટી પછી 2001માં ભારતની રાજદ્વારી હાજરી પુનઃસ્થાપિત કરવા કાબુલ ગયેલા ભારતીય પ્રતિનિધિમંડળનું નેતૃત્વ કર્યું હતું. 2000માં મોસ્કોમાં રાજદૂત તરીકેના કાર્યકાળ દરમિયાન રશિયા સાથે વ્યૂહાત્મક ભાગીદારી કરાર બનાવવામાં મદદ કરી.
લામ્બા, સાથીદારો અને પત્રકારો બંને માટે ‘સતી’ તરીકે ઓળખાય છે. કદાચ તેમના પાકિસ્તાની સમકક્ષ તારિક અઝીઝ સાથેની તેમની ભૂમિકા માટે શ્રેષ્ઠ રીતે યાદ કરવામાં આવશે, જેમને લશ્કરી શાસક પરવેઝ મુશર્રફ દ્વારા નિયુક્ત કરવામાં આવ્યા હતા. પાકિસ્તાનની ગુપ્ત મુલાકાતો અને અન્ય દેશોમાં બેઠકો દરમિયાન, લામ્બા અને અઝીઝે કાશ્મીરના મુદ્દાને સંબોધવા માટે ‘ફોર પોઇંટ ફોર્મ્યુલા’ તરીકે ઓળખાતા ડ્રાફ્ટ કરારને બહાર કાઢ્યો હતો.

------------------

વરિષ્ઠ IPS અધિકારી એએસ રાજન નેશનલ પોલીસ એકેડમીના નવા ડિરેક્ટર

વરિષ્ઠ IPS અધિકારી એએસ રાજને હૈદરાબાદ ખાતે સરદાર વલ્લભભાઈ પટેલ નેશનલ પોલીસ એકેડમી (SVPNPA) ના ડિરેક્ટર તરીકેનો કાર્યભાર સંભાળ્યો હતો. 1987ના અધિકારી રાજન તમિલનાડુના થેની જિલ્લાના છે અને બિહાર કેડરમાં હતા, પરંતુ બે દાયકા પહેલા તેમને આઈબીમાં ખસેડવામાં આવ્યા હતા.
IPSની ફાળવણી પછી અવિભાજિત બિહારના રાંચીમાં તાલીમાર્થી IPS અધિકારી તરીકે તેમની કારકિર્દીની શરૂઆત કરી હતી. પછી સાસારામ ખાતે મદદનીશ પોલીસ અધિક્ષક તરીકે નિયુક્ત કરવામાં આવ્યા હતા. તેમને રોહતાસ જિલ્લાના એસઓ તરીકે બઢતી આપવામાં આવી હતી. બિહારમાં તેમની 12 વર્ષની સેવા દરમિયાન, તેમણે રોહતાસ, ભાગલપુર, મુઝફ્ફરપુર, જહાનાબાદ અને પૂર્વ ચંપારણ - એવા જિલ્લાઓમાં કામ કર્યું જે રાજ્યના સૌથી મુશ્કેલ ભાગો તરીકે જોવામાં આવે છે. 1999માં, સેન્ટ્રલ ડેપ્યુટેશન માટે પસંદ પછી તેઓ ઇન્ટેલિજન્સ બ્યુરોમાં જોડાયા. IB અધિકારી તરીકે તેમણે નવી દિલ્હી, તમિલનાડુ, ગુજરાત, લદ્દાખ અને યુપીમાં સેવા આપી હતી. તેમણે લંડનમાં ભારતીય હાઈ કમિશનમાં મિનિસ્ટર (કોર્ડિનેશન) તરીકે ત્રણ વર્ષનો કાર્યકાળ પણ સંભાળ્યો હતો.
રાજને જણાવ્યું હતું કે, મારી પ્રાથમિકતા આ એકેડમીમાં આંતરરાષ્ટ્રીય ધોરણો સાથે મેળ ખાતી તાલીમ આપવાની છે. તમામ આંતરરાષ્ટ્રીય જોખમોનો સામનો કરવા માટે તાલીમની ગુણવત્તામાં પણ સુધારો કરવામાં આવશે.