વિશ્વભરમાં શાનદાર આતશબાજી અને રોશની સાથે નવા વર્ષ 2025નું ધામધૂમથી સ્વાગત કરાયું હતું. સિડનીથી લઇને રશિયાના વ્લાદિવોસ્તોક સુધી વિશ્વભરનાં શહેરોમાં નવા વર્ષની ઉજવણી કરવા લાખો લોકો એકઠા થયા હતા અને એકબીજાને શુભેચ્છાઓ પાઠવી હતી. ન્યૂઝીલેન્ડનું ઓકલેન્ડ નવા ઉજવણી કરનાર વિશ્વનું પ્રથમ મોટું શહેર બન્યું હતું. આ પછી ઓસ્ટ્રેલિયાના સિડનીમાં નવા વર્ષના આગમન સાથે લોકો જશ્નમાં ડૂબી ગયા હતા. ભારતમાં પણ લોકોએ વિશ્વશાંતિની પ્રાર્થના સાથે નવા વર્ષને આવકાર્યું હતું.
નવા વર્ષને આવકારવા સિડની અને ઓકલેન્ડમાં અદભુત આતશબાજી જોવા મળી હતી. સિડની હાર્બર બ્રિજ અને ન્યૂઝીલેન્ડના સૌથી ઊંચા બિલ્ડિંગ સ્કાય ટાવરમાં આતશબાજીથી આકાશ રોશનીથી ઝળહળી ઊઠ્યું હતું. 10 લાખથી વધુ વધુ ઓસ્ટ્રેલિયનો અને અન્ય લોકો આ ઉજવણી માટે સિડની હાર્બર ખાતે એકત્ર થયા હતાં.
ઓસ્ટ્રેલિયા, કૂક આઇલેન્ડ્સ, ફિજી, કિરીબાતી, નૌરુ, ન્યૂ કેલેડોનિયા, ન્યૂઝીલેન્ડ, પાપુઆ ન્યૂ ગિની, સમોઆ, સોલોમન આઇલેન્ડ્સ, ટોંગા સહિતના સાઉથ પેસિફિક ઓશનના દેશોમાં સૌ પ્રથમ નવા વર્ષનો પ્રારંભ થયો હતો.
જાપાનમાં નવા વર્ષના આગમન પહેલા ધાર્મિક સ્થળો અને ઘરોની સફાઈ કરાઈ હતી. જાપાનમાં 2025ને સ્નેક વર્ષ તરીકે મનાવવામાં આવશે. દક્ષિણ કોરિયામાં મુઆન ખાતે વિમાન દુર્ઘટનાને કારણે મોટાભાગના શહેરોમાં ઉજવણી રદ કરાઈ હતી. થાઇલેન્ડના બેંગકોકમાં શોપિંગ મોલ્સમાં લાઇવ મ્યુઝિકલ એક્ટ્સ અને આતશબાજી કરાઈ હતી. ઇન્ડોનેશિયાના જકાર્તામાં આશરે 800 ડ્રોન સાથે આતશબાજીથી નવા વર્ષને વધાવવામાં આવ્યું હતું.
ચીનના વડા શી જિનપિંગ અને રશિયન પ્રમુખ વ્લાદિમીર પુતિન વચ્ચે નવા વર્ષની શુભેચ્છાની આપ-લે થઈ હતી. જિનપિંગે તાઇવાનને સંબોધન કરીને હુંકાર કર્યો હતો કે, ચીન અને તાઇવાનના જોડાણને કોઈ ક્યારેય તોડી શકશે નહીં. વિવિધ સંઘર્ષોને કારણે મધ્ય-પૂર્વના દેશોમાં નવા વર્ષની ઉજવણી ફિક્કી રહી હતી. દુબઈમાં વિશ્વની સૌથી ઊંચી ગગનચુંબી ઈમારત બુર્જ ખલીફા ખાતે હજારો લોકો એકઠા થયા હતા.
રોમના પરંપરાગત નવા વર્ષની પૂર્વ સંધ્યાએ ઉત્સવનો માહોલ હતો. આની સાથે પોપ ફ્રાન્સિસના પવિત્ર વર્ષની શરૂઆત થઈ રહી છે. જર્મનીના ચાન્સેલર ઓલાફ સ્કોલ્ઝે દેશની નબળી અર્થવ્યવસ્થા અને રાષ્ટ્રને આંચકો આપનારા જીવલેણ ક્રિસમસ માર્કેટ હુમલા વચ્ચે નાગરિકોને એકજૂથ થવાની અપીલ કરી હતી.
રાષ્ટ્રપતિ મુર્મૂની શુભેચ્છા
રાષ્ટ્રપતિ દ્રૌપદી મુર્મુએ મંગળવારે નવા વર્ષની પૂર્વ સંધ્યાએ નાગરિકોને નવા વર્ષની શુભેચ્છા પાઠવી હતી અને દરેકને આપણા સમાજ અને રાષ્ટ્રને એકતા અને શ્રેષ્ઠતાના માર્ગે આગળ લઈ જવાનો અનુરોધ કર્યો હતો.
PM મોદીએ શુભકામના પાઠવી
વડાપ્રધાન નરેન્દ્ર મોદીએ X પર એક પોસ્ટમાં દેશવાસીઓને નવા વર્ષની શુભેચ્છા પાઠવી હતી અને 2024માં હાંસલ કરેલી નોંધપાત્ર પ્રગતિ અને પરિવર્તનનો ઉલ્લેખ કર્યો હતો. પોયેટિક સેલિબ્રેશન ગણાવીને મોદીએ જણાવ્યું હતું કે મેરા ભારત બઢ રહા છે.
