ઓલ્ડ વોર ઓફિસ હિન્દુજા હસ્તક

હિન્દુજા ગ્રૂપના વડા એસ. પી. હિન્દુજા અને જી. પી. હિન્દુજાએ સ્પેનની ઓબ્રાસ્કોન હુઆર્તે લેઇન ડેસારોલોસ (ઓએચએલડી) સાથે હિસ્સેદારીમાં આ હેરિટેજ બિલ્ડિંગ ખરીદી છે. ઇતિહાસ તેમ જ વ્હાઇટહોલનાં વારસામાં અમૂલ્ય યોગદાન આપનાર ઓલ્ડ વોર ઓફિસ ઘણા અત્યંત મહત્ત્વપૂર્ણ બનાવોની સાક્ષી રહી છે. ખાસ કરીને વિશ્વ યુદ્ધ દરમિયાન, અહીંની દીવાલો વચ્ચે જ અગત્યનાં નિર્ણયો લેવાતા હતા.
સેન્ટ્રલ લંડનનાં ૫૭ વ્હાઇટહોલ સ્થિત આ લેન્ડમાર્ક ઇમારતને નવો ઓપ આપીને પુનઃ વિકાસ કરી ત્યાં ફાઇવસ્ટાર હોટેલ અને રહેણાંક એપાર્ટમેન્ટ બનાવાશે. અગાઉ આ ઇમારતમાં જાહેર જનતા માટે પ્રવેશ નહોતો, પરંતુ હવે રી-ડેવલપમેન્ટ યોજના હેઠળ ઇમારતમાં આઉટડોર પબ્લિક સ્પેસ પૂરી પાડીને જાહેર જનતાને પ્રવેશ અપાશે. બ્રિટનના સંરક્ષણ મંત્રાલયે આ સોદાને સમર્થન આપતાં જણાવ્યું હતું કે, હિન્દુજા ગ્રૂપે સ્પેનના ઓએચએલડી સાથે ઓલ્ડ વોર ઓફિસ હસ્તગત કરી છે. આશરે ૫.૮૦ લાખ ચોરસ ફૂટની આ પ્રોપર્ટીને વણજાહેર કરેલી કિંમતે ૨૫૦ વર્ષના ભાડાપટ્ટે સ્પર્ધાત્મક માર્કેટિંગ પ્રક્રિયા દ્વારા વેચવામાં આવી છે.
‘આ ઐતિહાસિક ઇમારતનું માન જાળવવા તેમ જ રાષ્ટ્રીય ધરોહરના પુનઃવિકાસ દ્વારા દરજ્જો ઉપર ઉઠે તે માટે તમામ પ્રયત્ન કરીશું. લોકો સાથે વારસાનું પુનઃ જોડાણ થઈ શકે તેમ જ આ સિમાચિહન સ્થળ માટે એક નવો ઓપ આપીશું જેથી ઐતિહાસિક સ્થળનું મહત્ત્વ વધી શકે.’ તેમ શ્રીચંદ પી. હિન્દુજા અને ગોપીચંદ પી. હિન્દુજાએ જણાવ્યું હતું.