ચીનમાં ૫૭ માળની ઇમારત ૧૯ દિવસમાં તૈયાર

બેઇજિંગઃ એક બહુમાળી ઈમારત બનાવવા માટે વર્ષો લાગી જાય, પણ ચીનનાં હુનાન પ્રાંતમાં એન્જિનિયરિંગે કમાલ કરી છે. ૫૭ માળની ઈમારત માત્ર ૧૯ દિવસમાં જ પુરી કરી દેખાડી છે. આ ઇમારત બનાવનાર કંપનીનો દાવો છે કે હવે તેઓનું નામ દુનિયાની સૌથી ઝડપી બિલ્ડીંગ બાંધનાર બિલ્ડરમાં સામેલ થઈ ગયું છે.
ચાંગશામાં બનેલી આ ઈમારતમાં દરરોજ ત્રણ માળનું બાંધકામ કરાતું હતું. તેનાં માટે ૧૫ હજારથી વધારે ટ્રકોમાં સામાન મંગાવાયો હતો. ઈકોફ્રેન્ડલી આ ઈમારત તૈયાર કરવા માટે મોડયુલર ટેક્નોલોજીનો ઉપયોગ કરાયો હતો. આ કંપની આટલાથી અટકવા નથી માંગતી. હવે આ કંપનીનો ઈરાદો સ્કાઈસ્ક્રેપર બનાવવાનો છે. કંપની ૨૨૦ માળની આ બિલ્ડીંગને ત્રણ મહિનામાં પૂરી કરવા માંગે છે. આ બિલ્ડીંગમાં ૮૦૦ એપાર્ટમેન્ટ ભાડા માટે બન્યા છે અને ૪૦૦૦ લોકો માટે ઓફિસ સ્પેસ પણ છે. કંસ્ટ્રક્શન કંપનીનો દાવો છે કે ઈમારત એકદમ સુરક્ષિત અને ભૂકંપપ્રતિરોધક છે.