ઓછી ઊંઘથી વડોદરાના શિક્ષકે અનોખી શક્તિ કેળવી

વડોદરાઃ ધ્યાન, યોગ અને ઓછી ઊંઘથી વ્યક્તિની સુષુપ્ત શક્તિઓને ઉજાગર કરવામાં મદદ મળે છે તેવું સાબિત થઇ રહ્યું છે. સ્વામી વિવેકાનંદ, આલ્બર્ટ આઇન્સ્ટાઇન, નરેન્દ્ર મોદી જેવા મહાનુભાવો ગણતરીના કલાકોની જ ઊંઘ લઇને પણ સફળ થઇ શક્યા છે.

વડોદરાના એક યુવા શિક્ષકે પણ કંઇક આવી જ નીતિ-રીતિ અપનાવી ને સફળતા મેળવી છે. ટ્યુટર રાકેશ પટેલે સતત ૧૭૪ કલાક (૭ દિવસ અને છ કલાક) સુધી જાગવાનો વિશ્વવિક્રમ સ્થાપિત કર્યો છે. આ પૈકીના ૧૫૪ કલાકો સુધી સતત વિદ્યાર્થીઓ સમક્ષ ધોરણ ૮, ૯ અને ૧૦ ના પટેલે ગણિત વિષે લેક્ચર આપ્યા હતા.

ગોલ્ડન બુક ઓફ વર્લ્ડ રેકોર્ડસમાં આ કામગીરીને ગણિત વિષેના સહુથી લાંબા સત્ર તરીકે બિરદાવીને એની વર્લ્ડ રેકોર્ડરૂપે નોંધ લેવાઇ છે. ૬મેથી ૧૩મે દરમિયાન રાકેશ પટેલે આ સિધ્ધિ મેળવી હતી. તેઓ છેલ્લા ત્રણ વર્ષથી રોજ ત્રણથી ચાર કલાકની જ ઊંઘ લે છે.

શિક્ષિકા પત્ની ભક્તિબહેન પટેલની પ્રેરણાથી રાકેશભાઇએ મન પર નિયંત્રણ મેળવી પોતાના બંને હાથને અલગ-અલગ દિશામાં ફેરવી એટલે કે એક હાથને ક્લોકની દિશામાં અને બીજા હાથને એન્ટિક્લોકની દિશામાં ફેરવીને એક મિનિટમાં ૨૫૨ આંટા પૂરા કરી બીજો વિક્રમ નોંધાયો છે.

૩૪ વર્ષના આ કોમર્સ ગ્રેજ્યુએટે જુદીજુદી વ્યક્તિઓ પાસેથી ૧૦૮ શબ્દો સાંભળ્યા એ પછી માત્ર ૪૭ સેકંડમાં કોઇ ભૂલ વગર એ બધા શબ્દોને ક્રમાનુસાર બોલી બતાવ્યા આ રીતે એમણે ત્રીજો વિક્રમ નોંધાવ્યો છે.