બેન્ક સાથે ૨૮ લાખ ડોલરની છેતરપિંડીઃ ટેનેસીના જયેશ પટેલને ૪૨ માસની જેલ

જજ લીઓન જોર્ડને ચુકાદામાં જણાવ્યા અનુસાર, ટેનેસીના ૪૯ વર્ષના જયેશ ડાહ્યાભાઇ પટેલે જેલની સજા પૂરી થઇ ગયા પછી પાંચ વર્ષ સુધી સુપરવિઝન હેઠળ રહેવું પડશે. જયેશ પટેલ સામે ગયા વર્ષે કેસ કરવામાં આવ્યો હતો અને એમણે ગુનો કબુલ્યો હતો. જજે કહ્યું હતું કે જાન્યુઆરી ૨૦૦૯થી ઓગસ્ટ ૨૦૧૧ સુધીમાં ખોટા બિલો બનાવીને બેંક પાસેથી ૨૮ લાખ ડોલરની લોન લીધી હતી.
જયેશ પટેલે લોન મેળવવા માટે ખોટા ઇનકમ ટેક્સ રિટર્ન રજૂ કર્યા હતા. જેની સામે બેંકે તેમને લોન આપી હતી. આ પછી વધુ લોન મેળવવા માટે તેણે બોગસ ઇનવોઇસ રજૂ કરી ફરીથી બેંકમાંથી લોન મેળવવા પ્રયાસ કર્યો હતો, પરંતુ પકડાઇ ગયો હતો. આમ જયેશ પટેલને જેલની સજા તો ભોગવવી જ પડશે સાથોસાથ ૨૮ લાખ ડોલર પણ બેંકને પરત કરવા પડશે.