બાળઉછેરનો ખર્ચ £૨૩૦,૦૦૦ઃ એક દસકામાં ૬૩ ટકાનો વધારો
લંડનઃ ગત દસકા દરમિયાન બાળકને તેના જન્મથી ૨૧ વર્ષ સુધી ઉછેરવાનો ખર્ચ ૬૩ ટકા વધીને £૨૩૦,૦૦૦ના આંકડે પહોંચી ગયો છે. સેન્ટર ફોર ઈકોનોમિક્સ એન્ડ બિઝનેસ રીસર્ચના આંકડા આધારિત અભ્યાસ અનુસાર હવે પેરન્ટ્સ તેમની પ્રી-ટેક્સ વાર્ષિક કમાણીનો સરેરાશ લગભગ ત્રીજો હિસ્સો માત્ર એક પુત્ર અથવા પુત્રીના ઉછેર પાછળ વાપરે છે.
સમગ્ર યુકેમાં બાળકો પાછળનો ખર્ચ પ્રેશર પોઈન્ટ બની ગયો છે. બાળઉછેર ખર્ચનો ત્રીજો હિસ્સો એટલે કે આશરે સરેરાશ £૪૨,૦૦૦, બાળક પ્રાઈમરી સ્કૂલમાં જતું થાય તે પહેલા વપરાય છે. નોર્થ-ઈસ્ટના પેરન્ટ્સ તેમની પારિવારિક આવકનો ત્રીજો હિસ્સો ત્રણ વર્ષથી નાના બાળક માટે નર્સરી પાછળ વાપરે છે. આ પછી વેલ્સનો ક્રમ છે. લંડનમાં ઉંચા વેતન છતાં તેઓ વેતનનો ચોથો હિસ્સો ખર્ચે છે. બાળઉછેરમાં શિક્ષણ પાછળ સૌથી વધુ ખર્ચ થાય છે. જો તેને સરકારી શાળા અને યુનિવર્સિટીમાં શિક્ષણ અપાય તો થતાં £૭૪,૩૦૦ના ખર્ચમાં સ્કૂલ યુનિફોર્મ, બૂક્સ, પરિવહન અને યુનિવર્સિટી ટ્યુશન ફીનો સમાવેશ થાય છે. ૨૦૦૩ પછી આ ખર્ચ બમણો થઈ ગયો છે.