સરેરાશ પરિવાર જીવનકાળમાં આશરે £૭૩૫,૦૦૦ ટેક્સ ચુકવે છે

લંડનઃ ટેક્સપેયર્સ એલાયન્સ સંસ્થાના નવા વિશ્લેષણ અનુસાર યુકેના તમામ પરિવારોના માતા પર ટેક્સેશનનો બોજ આવે છે, જેનાથી જીવનનિર્વાહનો ખર્ચ વધી જાય છે. સરેરાશ પરિવાર તેમના જીવન દરમિયાન કરવેરા તરીકે આશરે £૭૩૫,૦૦૦ની ચૂકવણી કરે છે અને એક વર્ષની £૧૧.૪૬ બિલિયનની વિદેશી સહાયના બજેટનું ભંડોળ ૧૫,૬૧૦ ઘરના ટેક્સબિલ મારફત ઉભું કરાય છે. કરદાતાના ૪૦ વર્ષના કામકાજ અને ૧૫ વર્ષની નિવૃત્તિને આધારિત ગણતરી અનુસાર ટેક્સ બિલમાં £૨૫૩,૦૪૦નો ઈન્કમ ટેક્સ, £૧૪૬,૭૭૫નો વેટ, £૯૨,૭૯૫ના નેશનલ ઈન્સ્યુરન્સ અને £૫૯,૯૫૫ના કાઉન્સિલ ટેક્સનો સમાવેશ થાય છે. ટેક્સદર નીચે લાવવા સરકારને નકામા ખર્ચા દૂર કરવા જણાવાયું છે.

સંશોધનકારોએ ડેટાને પાંચ આવકજૂથમાં વિભાજિત કર્યા હતા.સરેરાશ પરિવારની સંયુક્ત વાર્ષિક આવક £૩૯,૨૦૦ ગણવામાં આવી હતી. સરેરાશ ટેક્સબિલ £૭૩૪,૨૪૦ની ચૂકવણી કરવા સરેરાશ બ્રિટિશ નાગરિકે ૧૮.૭ વર્ષ કામ કરવું પડે છે. પાંચમા ક્રમે £૧૨,૯૧૪ની વાર્ષિક આવક સાથે સૌથી ગરીબ પરિવારે જીવનકાળમાં £૨૮૨,૪૪૫ની ટેક્સ ચૂકવણી કરવી પડે છે, જે ગયા વર્ષની સરખામણીએ ૪.૧ ટકા વધુ છે. બીજી તરફ, પ્રથમ ક્રમે સૌથી વધુ આવક £૮૩,૭૫૦ ધરાવતા ૨૦ ટકાના જૂથે £૧.૪૮ મિલિયનની ટેક્સચૂકવણી કરવી પડે છે, જે ગયા વર્ષની સરખામણીએ ૨.૨ ટકા ઓછી છે.

ગયા વર્ષે ચાન્સેલર ઓસ્બોર્ને લોકોના ટેક્સ શેના પાછળ ખર્ચાય છે તેના આંકડા આપવાની શરુઆત કરી હતી. £૩૦,૦૦૦ની વાર્ષિક આવક ધરાવતા પરિવારે તેના ટેક્સમાંથી £૧,૬૬૩ વેલ્ફેર માટે, £૧,૨૮૦ હેલ્થ, £૮૯૨ શિક્ષણ, £૮૨૨ સરકારી પેન્શન, £૫૧ ઈયુ બજેટ અને £૭૮ ઓવરસીઝ મદદ માટે આપવા પડે છે. ચાન્સેલરે ઈન્કમ ટેક્સ અને નેશનલ ઈન્સ્યુરન્સને સાંકળી લેવાનું સૂચન પણ કર્યું છે, જેનાથી ટેક્સ સિસ્ટમ સરળ બની શકે છે.