જીગર શાહની એચડીએફસીમાં જનરલ કાઉન્સેલ તરીકે નિયુક્તિ

લંડનઃ ભારતની ખાનગી ક્ષેત્રની સૌથી મોટી બેન્ક એચડીએફસી દ્વારા જીગર શાહની જનરલ કાઉન્સેલ તરીકે નિમણૂક કરાઈ છે. તેઓ હાલમાં બલ્જ-બ્રેકેટ પ્રાઇવેટ ઇક્વિટી ફર્મ KKR ની સ્થાનિક પેટાકંપનીમાં મેનેજિંગ ડિરેક્ટર અને હેડ ઓફ કમ્પ્લાયન્સ તરીકે કાર્યરત છે.

બેંકે તેના સ્ટોક એક્સચેન્જ ફાઇલિંગમાં જણાવ્યું છે કે, ગવર્નન્સ, નોમિનેશન એન્ડ રેમ્યુનરેશન કમિટીની ભલામણોના આધારે 20 ઓગસ્ટ, 2026થી જીગર શાહની જનરલ કાઉન્સેલ-ડેઝિગ્નેટ તરીકે અને 1 ઓક્ટોબર, 2026થી જનરલ કાઉન્સેલ તરીકેની નિમણૂકને મંજૂરી આપી છે.

યુનિવર્સિટી ઓફ લેસ્ટર અને ધ યુનિવર્સિટી ઓફ લો, લંડનના ભૂતપૂર્વ વિદ્યાર્થી એવા જીગર શાહ અગાઉ ડોઇશ બેંકમાં ભારત માટેના હેડ ઓફ કોર્પોરેટ બેંકિંગ એન્ડ સિક્યોરિટીઝ સહિત વિવિધ વૈશ્વિક ક્ષેત્રોમાં કાર્ય કરી ચૂક્યા છે. વર્ષ 2013માં તેઓ જેપી મોર્ગન ચેઝ એન્ડ કોર્પોરેશનમાં મેનેજિંગ ડિરેક્ટર અને ભારત માટેના કાનૂની વડા તરીકે જોડાયા હતા અને ત્યારબાદ 2018માં તેઓ KKR માં સામેલ થયા હતા.

જીગર શાહ બેંકિંગ અને નાણાકીય સેવાઓ ક્ષેત્રે કાનૂની, પાલન, ગવર્નન્સ અને નિયામકીય બાબતોમાં ત્રણ દાયકાથી વધુનો બહોળો અનુભવ ધરાવે છે.  આ અગાઉ તેઓ એલ્મક્રોફ્ટ કન્સલ્ટિંગ સર્વિસીસ સાથે જોડાયેલા હતા, જ્યાં તેમણે એક અગ્રણી એસેટ વર્કઆઉટ, રિસ્ટ્રક્ચરિંગ અને રિકવરી મેન્ડેટ્સનું નેતૃત્વ કર્યું હતું. જીગર શાહે તેમની કાનૂની કારકિર્દીની શરૂઆત યુકેમાં અગ્રણી આંતરરાષ્ટ્રીય લો ફર્મ્સ સાથે કરી હતી અને ત્યારબાદ તેઓ નાણાકીય સેવાઓ ક્ષેત્ર તરફ વળ્યા હતા.