યુક્રેનમાં આવેલો લક્ષ્મી મિત્તલનો પ્લાન્ટ રશિયાનો ટાર્ગેટ બન્યો

નવી દિલ્હીઃ યુરોપમાં ચાલી રહેલા સંઘર્ષ વચ્ચે, રશિયાએ યુક્રેનના રાષ્ટ્રપતિ વ્લાદિમીર ઝેલેન્સ્કીના વતન ક્રાયવી રિહમાં ભારતીય મૂળના અબજોપતિ લક્ષ્મી મિત્તલના આર્સેલર મિત્તલ માઈનિંગ એન્ડ મેટલર્જિકલ કોમ્પ્લેક્સ પર મિસાઈલ હુમલો કર્યો હતો. યુક્રેનના સૌથી મોટા ઈન્ટિગ્રેટેડ સ્ટીલ યુનિટ પર થયેલા હુમલામાં બે લોકો માર્યા ગયા અને 14 કામદારો ઘાયલ થયા. મુખ્ય પાવર અને બ્લાસ્ટ-ફર્નેસ કામગીરીને નુકસાન થયા બાદ ફેક્ટરીમાં ઉત્પાદન આંશિક રીતે બંધ કરવામાં આવ્યું હતું.
રશિયા પર યુક્રેનના મોટા ડ્રોન હુમલાના જવાબમાં આ હુમલો થયો હતો. યુક્રેનના સૌથી મોટા સ્ટીલ ઉત્પાદકો પૈકી એક, આર્સેલર મિત્તલ ક્રાયવી રિહે પુષ્ટિ આપી કે તેમના એક સ્થળને મિસાઈલ હુમલામાં નિશાન બનાવવામાં આવ્યું હતું. કંપનીએ કહ્યું કે, હુમલા બાદ તેમની કામગીરી આંશિક રીતે બંધ કરવી પડી. અગાઉ યુક્રેને સેંકડો ડ્રોનથી રશિયા પર હુમલો કર્યો હતો. કિવ દ્વારા આને યુદ્ધના સૌથી મોટા હવાઈ હુમલાઓ પૈકી એક ગણાવવામાં આવી રહ્યો છે. આ હુમલામાં ઓછામાં ઓછા 6 લોકો માર્યા ગયા હતા. યુક્રેનના અનેક અન્ય પ્રદેશોમાં રશિયન હુમલાઓની અસર અનુભવાઈ. દક્ષિણ-પૂર્વીય ઝાપોરિઝિયા પ્રદેશમાં બે લોકો માર્યા ગયા હતા, જ્યારે એક વ્યક્તિનું સરહદી પ્રદેશ સુમીમાં અને એક વ્યક્તિનું પૂર્વીય ડોનેટ્સકમાં મૃત્યુ થયું હતું. રશિયન હુમલાઓના કારણે કિવમાં અનેક સ્થળે આગ લાગી હતી, જેમાં 6 લોકો ઘાયલ થયા હતા. શહેરના સૌથી મોટા પુસ્તક બજારો પૈકી એકમાં પણ આગ લાગી હતી, જેમાં પોચેના મેટ્રો સ્ટેશન નજીક અનેક કિઓસ્ક નાશ પામ્યાં હતાં.