ક્રેડના સ્થાપક કુણાલ શાહ વૈશ્વિક સ્તરે વોટ્સએપનું નેતૃત્વ કરશે

કેલિફોર્નિયાઃ મેટા પ્લેટફોર્મ્સે ફાઇનાન્શિયલ ટેક્નોલોજી સ્ટાર્ટઅપ 'ક્રેડ' ના સીરીઝ H ફંડિંગ રાઉન્ડના ભાગરૂપે 900 મિલિયન ડોલરનું રોકાણ કર્યું છે. આ સોદાના ભાગરૂપે ક્રેડના સ્થાપક કુણાલ શાહની વોટ્સએપના નવા વૈશ્વિક વડા તરીકે નિમણૂક કરવામાં આવી છે. તેઓ છેલ્લા સાત વર્ષથી આ લોકપ્રિય મેસેજિંગ પ્લેટફોર્મનું નેતૃત્વ કરનાર વિલ કેથકાર્ટનું સ્થાન લેશે. કરારની શરતો અનુસાર મેટા કંપની ક્રેડમાં આશરે 20 ટકા જેટલો માઇનોરિટી હિસ્સો હસ્તગત કરશે. આ રોકાણ સાથે ક્રેડનું પોસ્ટ-મની મૂલ્યાંકન 4.5 અબજ ડોલર પર પહોંચી ગયું છે. આ ફંડિંગ પ્રાઇમરી અને સેકન્ડરી શેરની ખરીદીના સંયોજન સ્વરૂપે કરવામાં આવ્યું છે. આ નવી જવાબદારી સાથે કુણાલ શાહ ક્રેડના ચીફ એક્ઝિક્યુટિવ ઓફિસરપદેથી મુક્ત થશે અને મેટાની વૈશ્વિક લીડરશિપ ટીમમાં જોડાશે. તેઓ વિલ કેથકાર્ટ પાસેથી કાર્યભાર સંભાળશે. મેટાના જણાવ્યા અનુસાર કુણાલ શાહ વોટ્સએપને તેના આગામી વિકાસના તબક્કા તરફ દોરી જવા માટે જવાબદાર રહેશે. તેમની મુખ્ય પ્રાથમિકતા જાહેરાતો અને સબ્સ્ક્રિપ્શન પ્રોડક્ટ્સ દ્વારા પ્લેટફોર્મની આવકમાં વૃદ્ધિ કરવાની તેમજ વોટ્સએપમાં AI એજન્ટોને સંકલિત કરવાની રહેશે.