નવા સંસદ ભવનને આકાર આપનારા આર્કિટેક્ટ બિમલ પટેલ અનેક પ્રસિદ્ધ ઈમારતોનું કરી ચૂક્યા છે નિર્માણ

વડાપ્રધાન નરેન્દ્ર મોદીએ 28 મેના રોજ દેશના નવા સંસદ ભવનનું ઉદ્ઘાટન કર્યું હતું. આ બાંધકામ કાર્ય સેન્ટ્રલ વિસ્ટા રિ-ડેવલપમેન્ટ પ્રોજેક્ટનો એક મહત્વપૂર્ણ ભાગ છે. નવું સંસદ ભવન ગુજરાતના ખ્યાતનામ આર્કિટેક્ટ બિમલ પટેલ દ્વારા ડિઝાઇન કરવામાં આવ્યું છે. દેશમાં પૂરા થયેલા અને ચાલી રહેલા કેટલાક મહત્વપૂર્ણ પ્રોજેક્ટ પાછળ પણ તેમનું નામ જોડાયેલું છે. ચરોતર ભૂમિના સોજિત્રા ગામના વતની હસમુખ પટેલ અને ભક્તિબેનના સુપુત્ર બિમલ પટેલે કાશી વિશ્વનાથ કોરિડોરની ડિઝાઈન પણ તૈયાર કરી છે.
બિમલ પટેલ કોણ છે?
બિમલ પટેલ ત્રણ દશકથી વધુનો અનુભવ ધરાવતા જાણીતા આર્કિટેક્ટ છે. તેઓ શહેરી ડિઝાઇન અને આયોજનમાં નિષ્ણાત છે. બિમલભાઇ ‘સેપ્ટ’ના નામે વિખ્યાત અમદાવાદ સ્થિત સેન્ટર ફોર એન્વાયર્નમેન્ટલ પ્લાનિંગ એન્ડ ટેકનોલોજીના ચેરમેન છે. બિમલભાઇ 2012થી આ યુનિવર્સિટીનું નેતૃત્વ કરે છે. આ સાથે તેઓ HCP ડિઝાઇન પ્લાનિંગ એન્ડ મેનેજમેન્ટ પ્રાઇવેટ લિમિટેડના પ્રમુખ છે. હસમુખ પટેલ એક પ્રતિષ્ઠિત આર્કિટેક્ટ પણ હતા જેમણે ઘણી આઇકોનિક ઇમારતો ડિઝાઇન કરી હતી.
ડિઝાઈનિંગ ક્ષેત્રે મોટું નામ, પદ્મ સહિત અનેક એવોર્ડ એનાયત 
ડૉ. બિમલ પટેલને તેમના કાર્ય દ્વારા અનેક એવોર્ડથી નવાજવામાં આવ્યા છે. તેમના કાર્ય અને તેમના પ્રોજેક્ટ્સને આર્કિટેક્ચર માટે આગા ખાન એવોર્ડ (1992), વર્લ્ડ આર્કિટેક્ચર એવોર્ડ (1997), યુએન સેન્ટર ફોર હ્યુમન સેટલમેન્ટ્સ એવોર્ડ ઓફ એક્સેલન્સ (1998), આર્કિટેક્ચર રિવ્યુ હાઇ કમ્મેન્ડેશન એવોર્ડ (2001) સહિત અનેક પુરસ્કારોથી સન્માનિત કરાયા છે. તેઓ શહેરી આયોજન અને ડિઝાઇનમાં શ્રેષ્ઠતા માટે વડાપ્રધાનના રાષ્ટ્રીય પુરસ્કાર (2003) અને HUDCO ડિઝાઇન પુરસ્કાર (2013)ના પ્રાપ્તકર્તા પણ છે. તેમને 2019માં પદ્મશ્રી પુરસ્કારથી સન્માનિત કરાયા હતા.
સંસદ, રાજપથ રિડેવલપમેન્ટ માટે 229 કરોડનો સોદો
બિમલ પટેલની કંપનીએ સેન્ટ્રલ વિસ્ટા પ્રોજેક્ટ માટે કન્સલ્ટન્સી બિડ જીતી હતી. તેમની પેઢીએ નવી સંસદ સહિતના મહત્વાકાંક્ષી પ્રોજેક્ટ માટે કન્સલ્ટન્સી સેવા માટે રૂ. 229.75 કરોડમાં ડીલ કરી હતી. પટેલની પેઢી દ્વારા ઓફર કરવામાં આવતી સેવાઓમાં પ્રોજેક્ટ માટે માસ્ટર પ્લાનની તૈયારી અને તેમાં સામેલ સ્ટ્રક્ચર્સની ડિઝાઇન, ખર્ચ અંદાજ, ટ્રાફિક એકીકરણ, પાર્કિંગ સુવિધાઓ અને લેન્ડસ્કેપનો સમાવેશ થાય છે.
કયા પ્રોજેક્ટ્સમાં તેમણે કામ કર્યું?
તેમણે સમગ્ર ભારતમાં રહેણાંક, સંસ્થાકીય, વ્યાપારી, આવાસ, ઔદ્યોગિક અને શહેરી ડિઝાઇન અને શહેરી આયોજન પ્રોજેક્ટ્સની શ્રેણી પર કામ કર્યું છે.
બિમલભાઇના મહત્વના પ્રોજેક્ટ્સમાં આગા ખાન એકેડેમી હૈદરાબાદ, અમદાવાદ મેનેજમેન્ટ એસોસિએશન, ભુજ ડેવલપમેન્ટ સ્કીમ અને ટાઉન પ્લાનિંગ સ્કીમ્સ, સીજી રોડ રિડેવલપમેન્ટ, કાંકરિયા લેક ડેવલપમેન્ટ, સાબરમતી રિવરફ્રન્ટ ડેવલપમેન્ટ અને સ્વર્ણિમ સંકુલ, આંત્રપ્રિન્યોરશિપ ડેવલપમેન્ટ ઈન્સ્ટિટ્યૂટ, ગુજરાત હાઈ કોર્ટ, હિંમતનગર કેનાલફ્રન્ટ નો સમાવેશ થાય છે. વિકાસ, IIM અમદાવાદ નવું કેમ્પસ. આ સિવાય બિમલભાઇએ પ્રખ્યાત કાશી વિશ્વનાથ કોરિડોર પણ ડિઝાઇન કર્યો છે.