ફોન તો અડધાં સફરજન વાળાનો જ, બીજો ના ખપે, જે દર વર્ષે કહે છે - બેસ્ટ ફોન એવર!

નવું વર્ષ, નવો ફોન. પત્તા બદલાઈ રહ્યા છે, હવા તેજ થઈ રહી છે, અને સફરજન ફરી એક વાર આપણને કહી રહ્યું છે કે ગયા વર્ષે આપણે જે ફોન ખરીદ્યો હતો તે હવે લગભગ એક અવશેષ છે. અને આપણે, સફરજન કિંગડમની વફાદાર પ્રજા, કાન સતેજ રાખી, પાકિટ ખુલ્લા કરી, ‘મધ્યરાત્રિ’ના થોડા અલગ રંગમાં મૂળભૂત રીતે સમાન ફોન માટે આપણી મહેનતથી કમાયેલી રોકડ આપવા તૈયાર છીએ.
લોન્ચ ઇવેન્ટ - હંમેશની જેમ - માર્કેટિંગ જાદુમાં એક માસ્ટરક્લાસ હતી. આ વખતે, તેઓએ તેને ‘અદ્ભુત’ નામ આપ્યું, જેને અગ્રેજીમાં jaw dropping જોડે પ્રાસ બેસે તેવું નામ આપ્યું. જે વાસ્તવમાં પણ જો ડ્રોપિંગ એટલે જડબા તોડ જ હતું.
આ નવા ફોનની કિંમતની વાત કરું. જુઓ! ખિસ્સામાં પડેલા લાખ રૂપિયા કાઢીને જે જગ્યા થાય તેમા નવો ફોન ગોઠવાઈ જાય તે રીતે તેનું પ્રાઈસિંગ કરાતું હોય તેમ જણાય છે. અને દર વર્ષના લોન્ચની સ્ક્રિપ્ટ લખાય તો એક વાક્ય બદલાયા વગર એ જ રહે છે કે - કે આ નવો ફોન ‘અત્યાર સુધીનો સૌથી ઝડપી, શ્રેષ્ઠ ફોન છે’ કેવી રીતે છે. કેટલો ફાસ્ટ છે? 200 કિમી/કલાક?!! ‘અમારી નવી ચિપમાં 50% ઝડપી ન્યુરલ એન્જિન અને 30% વધુ કાર્યક્ષમ GPU છે!’ તેનો અર્થ શું છે? શું તે મને મારી કારની ચાવીઓ શોધવામાં મદદ કરે છે? શું તે આખરે મારી સાસુના મજાકને રમુજી બનાવે છે? ના... તેનો અર્થ એ છે કે હું 0.2 સેકન્ડ ઝડપથી ઇન્સ્ટાગ્રામ ખોલી શકું છું. અને તે માટે, હું ખુશીથી મારા આખા મહિનાનો પગાર શોરૂમમાં ચડાવીશ.
જોકે, આ વખતના એક ફોનની જાડાઈ (સોરી પાતળાઈ)એ હેડલાઇન સર્જી છે. ‘અત્યાર સુધીનો સૌથી પાતળો ફોન’. ચાલો, વક્રોક્તિની પ્રશંસા કરવા માટે થોડો સમય કાઢીએ. અહીં આપણે એક પેઢી છીએ જે સામૂહિક રીતે જીમમાં જવા, પિઝાના બીજા ટુકડાને ના કહેવા અને આખરે કોલેજકાળનાં પે’લા જીન્સમાં ફિટ થવા માટે સંઘર્ષ કરી રહી છે. આપણે પાતળા થવાની શોધમાં છીએ, અને આપણા ફોન! આપણા ફોન તે પ્રાપ્ત કરી રહ્યા છે જે આપણે કરી શકતા નથી. ટુ લુઝ ફ્યૂ ઇંચિસ!
અપેક્ષા ફક્ત ફોન વિશે જ નથી, પરંતુ લોન્ચિંગ ઈવેન્ટ વિશે પણ હોય છે. લાઇવ સ્ટ્રીમ્સ, ટેક સમિક્ષકો તેમના અતિશય નાટકીય અનબોક્સિંગ વીડિયોઝ આ બધું અત્યારે યુટ્યુબના અલ્ગોરિધમમાં આપણને પછાડીને બતાવાઈ રહ્યું છે. આપણને આપણા પોતાના પગારની પરવા નથી, પરંતુ નવા ફોનના ડાયમેન્શનની પરવા જરૂર છે. આપણે તેની જાડાઈના ચોક્કસ મીલી ને નેનોમીટર, તેની ઊંચાઈના ચોક્કસ સેન્ટીમીટર અને તેમાં આવતા ‘ટાઇટેનિયમ ને એલ્યુમિનિયમ’ના ચોક્કસ શેડને જાણીશું. આપણે આપણા સ્વાસ્થ્ય, આપણા શોખ, અથવા ક્યારેક, આપણા ભાડાં કરતાં પણ ફોન પર વધુ ખર્ચ કરવા તૈયાર છીએ જે ખરેખર વિચારવા જેવું તો ખરું. આ તો કટાક્ષ સાથે વ્યાવહારિક વાત પણ મેં મૂકી દીધી.
બાકી બનાવવામાં એક વર્ષ લીધું છે, તો ફોન જોરદાર હશે જ. પણ આ ફોનવાળા જ નવા ફોન લોન્ચ કરે ને જૂનાને સ્લો કરે એવું સાંભળ્યું છે માર્કેટમાં. કેટલું સાચું ખબર નહીં, પણ આ નવી ઓપરેટિંગ સિસ્ટમને ટેસ્ટ-રિટેસ્ટ-અને-સેટ થવા દેજો, કારણ કે તે ફોનને પત્નીની ખોપડી કરતાંય વધુ ગરમ કરે છે તેવું પણ સાંભળ્યું છે. બાકી નવાજૂની તો તમે કહેજો એ જ સફરજનના ફોન પર ઇન્સ્ટાગ્રામ ખોલી ને rjvishal સર્ચ કરી DM કરજો કે મારા લેખ કેવા લાગે છે. મળીએ, આવતા અંકમાં નવા લેખ સાથે...