કુમકુમ મંદિરે શાસ્ત્રી આનંદપ્રિયદાસજીના 83મા દિનની ઉજવણી:

અમદાવાદઃ સ્વામિનારાયણ સંપ્રદાયના ક્રાંતિકારી સંત શ્રી મુક્તજીવન સ્વામી બાપાએ સૌપ્રથમ શ્રી આનંદપ્રિયદાસજી સ્વામીને ત્યાગી સંતની દીક્ષા આપી તેને 83 વર્ષ પૂર્ણ થતાં સ્વામિનારાયણ મંદિર - કુમકુમ - મણિનગર ખાતે શ્રી આનંદપ્રિયદાસજી સ્વામીને 21 ફૂટનો વિશાળ હાર ધરાવાયો હતો. આ પ્રસંગે કુમકુમ મંદિરના સાધુ પ્રેમવત્સલદાસજીએ જણાવ્યું હતું કે, આજે સમગ્ર વિશ્વમાં સ્વામિનારાયણ સંપ્રદાયના અનેક મંદિરો છે અને અનેક સત્સંગીઓ છે, પરંતુ મહત્વની વાત એ છે કે, સ્વામિનારાયણ સંપ્રદાયમાંથી સૌપ્રથમ 1948માં શ્રી મુક્તજીવન સ્વામીબાપા અને શાસ્ત્રી શ્રી આનંદપ્રિયદાસજી સ્વામી આફ્રિકા પધાર્યા અને ત્યાં ચાર મહિના સુધી રોકાયા હતા અને ભારતીય સંસ્કૃતિનો પ્રચાર અને પ્રસાર કર્યો હતો. આ પછી સ્વામિનારાયણ સંપ્રદાયના સંતો વિદેશ જતા થયા છે. સાધુ પ્રેમવત્સલદાસજીએ કહ્યું હતું કે આનંદપ્રિયદાસજી સ્વામીએ યુરોપ - અમેરિકા - કેનેડા - દુબઈ સહિત અનેક દેશોમાં વિચરણ કરીને હજારોને વ્યસનમુક્ત કરીને સદાચારના પાઠ શીખવેલા છે.