સાઉથોલ ટ્રાવેલની અપ્રતિમ સફળતાઃ બ્રિટિશ ટ્રાવેલ એવોર્ડ્ઝમાં સિલ્વર એવોર્ડ

લંડનઃ સાઉથોલ ટ્રાવેલને પ્રતિષ્ઠિત બ્રિટિશ ટ્રાવેલ એવોર્ડ્ઝમાં મિડલ ઈસ્ટ/નોર્થ આફ્રિકા માટે શ્રેષ્ઠ ટ્રાવેલ કંપની કેટેગરીમાં સિલ્વર એવોર્ડ એનાયત કરાયો છે. આ સન્માન સાઉથોલ ટ્રાવેલ માટે સીમાચિહ્નરૂપ સિદ્ધિ છે જે વિશ્વના સૌથી ગતિશીલ અને લોકપ્રિય પ્રદેશોમાં અભૂતપૂર્વ પ્રવાસ અનુભવ પૂરો પાડવાની કંપનીની નિષ્ઠા પ્રદર્શિત કરે છે.
સાઉથોલ ટ્રાવેલના માર્કેટિંગ મેનેજર અનુજા ભગતે આ સંદર્ભે કહ્યું હતું કે, ‘આ એવોર્ડ જીતવો એ મહાન સન્માન છે અને તેનો યશ અમારા કસ્ટમર્સને જાય છે. તેમનો વિશ્વાસ અને વફાદારી અમને તેમનો પ્રવાસ અવિસ્મરણીય અને અવરોધો વિનાનો બની રહે તે માટે અમારી સેવાનું ધોરણ સતત ઊંચે લઈ જવાની પ્રેરણા આપે છે.’
સાઉથોલ ટ્રાવેલમાં મિડલ ઈસ્ટ માટે પ્રોડક્ટ મેનેજર નીલા ગોયલે આ લાગણીનો પડઘો પાડતાં ઉમેર્યું હતું કે, ‘આ એવોર્ડ અમારી ટીમની સખત મહેનત અને જોશને દર્શાવે છે. અમે દરેક પ્રવાસી અવિસ્મરણીય અનુભવ મેળવે તે માટે સતત પ્રયત્નશીલ રહીએ છીએ અને આ પ્રયાસોને આવા પ્રતિષ્ઠિત મંચ પર બિરદાવાય તે ખરેખર આનંદદાયક છે.’
સાઉથોલ ટ્રાવેલમાં આફ્રિકા માટે પ્રોડક્ટ મેનેજર પ્રીતિ ભુડિયાએ ઈનોવેશન પર કંપનીની પ્રતિબદ્ધતા પર ભાર મૂકતાં જણાવ્યું હતું કે, ‘અમે આ સિદ્ધિને ઉજવી રહ્યા છીએ ત્યારે અમે અમારી સેવાની ઓફરને કેવી રીતે વધુ આગળ લઈ જઈ શકાય તેના વિશે પણ વિચારીએ છીએ.’ મિડલ ઈસ્ટ અને નોર્થ આફ્રિકામાં પ્રવાસસ્થળોએ પ્રવાસ અનુભવોને યાદગાર બનાવવામાં સાઉથોલ ટ્રાવેલની કુશળતા તેની સફળતામાં પાયારૂપ છે. દુબઈમાં વૈભવી પ્રવાસ હોય કે મોરોક્કોમાં સાંસ્કૃતિક એડવેન્ચર હોય કે બિઝનેસ પ્રવાસ હોય, શ્રેષ્ઠતમ સેવા આપવાની કંપનીની પ્રતિબદ્ધતાએ જીવનના તમામ ક્ષેત્રોમાંથી પ્રવાસીઓની વફાદારી મેળવી છે.
સાઉથોલ ટ્રાવેલના ચીફ કોમર્શિયલ ઓફિસર જયમીન બોરખેતરિયાએ કહ્યું હતું કે, ‘આ સિલ્વર એવોર્ડ સાઉથોલ ટ્રાવેલની માત્ર તેના કસ્ટમર્સ માટે પ્રતિબદ્ધતાને જ નથી દર્શાવતો, પરંતુ ઈનોવેશન, ક્વોલિટી અને ગ્રાહકોના સંતોષ થકી ટ્રાવેલ ઈન્ડસ્ટ્રીમાં અગ્રેસર રહેવાની અમારી મહત્ત્વાકાંક્ષા પણ દર્શાવે છે.’
1984માં સ્થાપિત સાઉથોલ ટ્રાવેલ વિશ્વવ્યાપી ફ્લાઈટ્સ અને પેકેજીસના અગ્રણી ઓપરેટર અને યુકેમાં ભારતની ફ્લાઈટ્સ માટે સૌથી મોટા ટ્રાવેલ એજન્ટ છે. તેના સૌથી લોકપ્રિય હોલીડે પ્રવાસ-સ્થળોમાં ભારત, દુબઈ, ઈન્ડિયન ઓશન, થાઈલેન્ડ, યુએસ અને તૂર્કીનો સમાવેશ થાય છે.