ઉનાળાની શરૂઆત થતાં જ ફેશનજગતમાં આરામદાયક અને સ્ટાઇલિશ ફૂટવેરની માંગ વધી જાય છે. ભારે શૂઝ કે હાઈ હિલ્સને બદલે અત્યારે યુવતીઓ અને મહિલાઓમાં ‘મોજડી’નો ટ્રેન્ડ ટોચ પર છે. મોજડી માત્ર પરંપરાગત પહેરવેશ પૂરતી સીમિત નથી રહી, પરંતુ આધુનિક આઉટફિટ્સ સાથે પણ તે અદ્ભુત લાગે છે. ચાલો જાણીએ આ ઉનાળામાં ટ્રેન્ડમાં ચાલતી મોજડીઓ અને તેના વિવિધ પ્રકારો વિશે.
શા માટે ઉનાળામાં મોજડી છે બેસ્ટ?
ઉનાળામાં પરસેવો અને ગરમીને કારણે પગમાં બળતરા કે ફોડલી થવાની શક્યતા રહે છે. મોજડી સામાન્ય રીતે ચામડાં કે કાપડમાંથી બનાવવામાં આવે છે, જે પગમાં હવાની અવરજવર માટે પૂરતી જગ્યા આપે છે. વળી, તે ફ્લેટ હોવાથી ચાલવામાં આરામદાયક રહે છે અને પગને તડકાથી સુરક્ષિત રાખે છે.
મોજડીમાં અનેકવિધતા
• પંજાબી મોજડી: પંજાબી મોજડી હંમેશાં સદાબહાર રહે છે. તેમાં કરવામાં આવતું બારીક ભરતકામ અને ડાર્ક કલર્સ તેને ખાસ બનાવે છે. આજકાલ તેમાં ફ્લોરલ પ્રિન્ટ અને પેસ્ટલ કલર્સ ઉનાળા માટે ખૂબ જ ટ્રેન્ડમાં છે.
• ખુસ્સા મોજડી: આ મોજડીનો આકાર થોડો અલગ અને આગળથી વળેલો હોય છે. તેમાં ઘણીવાર જરદોશી કામ કે અરીસા જડેલા હોય છે. લગ્નપ્રસંગે કે ફંક્શન્સમાં હેવી કુર્તી સાથે તે રોયલ લુક આપે છે.
• ડેનિમ અને ફેબ્રિક મોજડી: આજકાલ આધુનિક યુવતીઓ જીન્સ અને ટ્યુનિક ટોપ સાથે ડેનિમ ફેબ્રિકની મોજડી પહેરવાનું પસંદ કરે છે. તેમાં વિવિધ પ્રિન્ટ્સ જેમ કે ઈકત, અજરક કે કલમકારી જોવા મળે છે, જે ઈન્ડો-વેસ્ટર્ન લુક પૂરો પાડે છે.
• સિક્વન અને મોતી વર્કઃ રાત્રિના પ્રસંગો માટે સિક્વન (ચમકીલા સિતારા) અને સફેદ મોતીથી મઢેલી મોજડીઓ ઘણી આકર્ષક લાગે છે. તે સાડી અને લહેંગા સાથે પરફેક્ટ મેચ થાય છે.
