હાલમાં અભિનેત્રી શ્રદ્ધા કપૂરની પાંચે આંગળીઓ ઘીમાં છે. તાજેતરમાં પણ શ્રદ્ધા કપૂરની બંને ફિલ્મો ‘સાહો’ અને ‘છિછોરે’ બોક્સઓફિસ પર સફળ રહી છે. હવે તે ‘બાગી-૩’ની તૈયારીઓમાં વ્યસ્ત છે. આ ફિલ્મમાં ટાઇગર શ્રોફનાં એકશન દૃશ્યો સાથે મેચ થવા અભિનેત્રી પણ એકશન દૃશ્યોની આકરી તાલીમ લઇ રહી છે. શ્રદ્ધા પોતાની ટ્રેનર મહેક નાયર પાસેથી તો તાલીમ લઇ જ રહી છે તે ઉપરાંત ફિલ્મમેકર અહેમદ ખાને વ્યવસ્થા કરેલી બલ્ગેરિન ટ્રેનર પાસેથી પણ તાલીમ લઇ રહી છે. આ બંને ટ્રેનરો દર પંદર દિવસે મળીને શ્રદ્ધાની તાલીમ અંગે ચર્ચા કરે છે અને એ પછીની પંદર દિવસ માટેની તાલીમનું શિડ્યુલ બને છે. શ્રદ્ધાને મિક્સડ માર્સક આર્ટ્સની તાલીમ આપવામાં આવે છે. આ માટે શક્તિ અને ક્ષમતા કેળવવા તેના ડાયટમાં પણ ફેરફાર કરવામાં આવ્યો છે. ઉલ્લેખનીય છે કે ‘બાગી-૩’ના પ્રથમ ત્રણ શૂટિંગ શિડયુલ ભારતમાં ગોઠવાયા છે અને ૪૦ દિવસ સર્બિયામાં શૂટિંગનું શિડ્યુલ નક્કી કરાયું છે. સર્બિયામાં મોટાભાગનાં એકશન દૃશ્યોનું શૂટિંગ થશે.
