વોશિંગ્ટનઃ સ્વિત્ઝર્લેન્ડની ડ્રગ્સ બનાવતી જગવિખ્યાત કંપની નોવાર્ટીસે બાળકોમાં જોવા મળતા એક વિશિષ્ટ રોગની જીન થેરેપી માટે ખાસ પ્રકારની દવા વિકસાવી છે. આ ડ્રગ્સના ઉપયોગ અને વેચાણ માટેની અમેરિકાએ મંજૂરી પણ આપી છે. આ ડ્રગ્સની વિશેષ વાત એ છે કે આ ડ્રગ્સ વિશ્વની સૌથી મોંઘી ડ્રગ્સ છે. આ ડ્રગ્સના જીન થેરેપીના એક ડોઝની કિંમત ૨૧ લાખ ડોલર એટલે કે અંદાજે ૧૪ કરોડ રૂપિયા નક્કી કરાઇ છે. અમેરિકાના ફુડ એન્ડ ડ્રગ્સ વિભાગ દ્વારા આ ડ્રગ્સને તાજેતરમાં જ પરમિશન આપવામાં આવી છે. આ ડ્રગ્સની મદદથી સ્પાઇનલ મસ્ક્યુલર એટ્રોફી (એસએમએ - કરોડરજ્જુની માંસપેશીઓનું સંકોચન)ની સારવાર કરવામાં આવશે. આ બીમારી ખાસ કરીને બાળકોમાં આ જોવા મળે છે.
આ પહેલા નોવાર્ટીસ કંપનીએ જાહેરાત કરી હતી કે આ ડ્રગ્સની કિંમત ૧૫ લાખથી ૫૦ લાખ ડોલરની વચ્ચે રહેશે. આ સિવાય કંપની દ્વારા એવું પણ જાહેર કરવામાં આવ્યું છે કે જો આ થેરેપી નિષ્ફળ જશે તો વીમો પણ આપવામાં આવશે. આ પ્રકારની બીજી પણ એક ડ્રગ્સ માર્કેટમાં પહેલેથી ઉપલબ્ધ છે, જેનું નામ સ્પિનરાઝા છે. જોકે એ ડ્રગ્સને આજીવન કરોડરજ્જુમાં ઇન્જેક્ટ કરવી પડે છે. જેની કિંમત ૭.૫૦ લાખ ડોલર છે. તેની સામે નોવાર્ટીસ કંપનીએ બનાવેલી આ ડ્રગ્સથી માત્ર એક જ વખત થેરપી આપવી પડે છે. નોવાર્ટીસના અધિકારીઓએ ઉંચી કિંમત અંગે બચાવ કરતાં જણાવ્યું કે આજીવન ચાલતી અન્ય લાંબી સારવારોની સામે આ કિંમત ઓછી જ છે.
આ રોગ શું છે?
એસએમએ એ જનીનમાં ખામીના પરિણામે સર્જાતો રોગ છે. જે નવજાત બાળકોમાં જોવા મળે છે. જે બાદમાં મોટા ભાગના બાળકોના મોતનું કારણ બને છે અથવા તો જો તે જીવી જાય તો તેમને જીવનભર આ બીમારીથી પીડાવું પડે છે. પ્રત્યેક ૧૦,૦૦૦ નવજાત બાળકોમાંથી એક ટકા બાળકોને આ બીમારીનો શિકાર બને છે. જેમાંથી ૫૦થી ૭૦ ટકા બાળકોના મોત થાય છે. આ નવી ડ્રગ વડે, જીન થેરેપીની મદદથી આ બીમારી દૂર થઇ શકશે તેવો નોવાર્ટીસ કંપની દાવો કરી રહી છે. જે માટે કંપની દ્વારા ટેસ્ટીંગ પણ કરવામાં આવ્યું છે.
