વિવેક અગ્નિહોત્રીની બહુચર્ચિત ‘ધ કાશ્મીર ફાઈલ્સ’ દેશ-વિદેશમાં ધૂમ મચાવી રહી છે. હવે આ ફિલ્મને લઈને નવા એક અપડેટ આવ્યા છે. જે અનુસાર મુસ્લિમ આબાદી ધરાવતા દુબઇ અને સિંગાપોર જેવા દેશોમાં આ ફિલ્મ એક પણ કટ વગર રિલીઝ કરાશે. તેમજ 15 વરસથી વધુ વયની દરેક વ્યક્તિ આ ફિલ્મ જોઇ શકશે. આ ફિલ્મને યૂએઇમાં રિલીઝ કરવાની સેન્સરની મંજૂરી મળી ગઇ છે. ખાસ વાત તો એ છે કે, આ ફિલ્મ કોઇ પણ કટ વગર સાતમી એપ્રિલે રિલીઝ થશે.
વિવેક અગ્નિહોત્રીએ સોશ્યલ મીડિયા પર આ ખુશખબર શેર કરતાં લખ્યું હતુંઃ આ એક બહુ મોટી જીત છે. અમારી ફિલ્મને યૂએઇના સેન્સર બોર્ડથી મંજૂરી મળી ગઇ છે. રેટેડ 15 પ્લસ સાથે આ ફિલ્મને કોઇ પણ કટ વગર 7 એપ્રિલના રિલીઝ કરાશે. આ પછી સિંગાપોરનો વારો છે.
વિવેકે વધુમાં કહ્યું હતું કે, ભારતમાં ઘણા લોકોએ આ ફિલ્મને ઇસ્લામોફોબિક તરીકે ગણાવી છે, પરંતુ એક ઇસ્લામિક દેશે ચાર અઠવાડિયા સુધી તપાસ કર્યા પછી આ ફિલ્મને ઝીરો કટ અને 15 વરસથી ઉપરના દર્શકો માટે રજૂ કરવાની મંજૂરી આપી છે, જ્યારે ભારતમાં આ ફિલ્મને 18 વરસથી મોટી વયના લોકો માટે પ્રદર્શિત કરવા મંજૂરી મળી છે. ફિલ્મને લગતી એક રસપ્રદ વાત એ પણ છે કે, બોક્સ ઓફિસ પરના કલેકશનમાં રાજામૌલીની આરઆરઆરની આંધી પણ તેને હંફાવી શકી નથી. ‘ધ કાશ્મીર ફાઇલ્સ’એ બોક્સ ઓફિસ પર 250 કરોડ રૂપિયાની કમાણીનો આંકડો પાર કરી દીધો છે.