ભારતીય ફિલમઉદ્યોગનો ઓસ્કર ગણાતો ફિલ્મફેર એવોર્ડ્સ સમારોહ શનિવારે રાત્રે અમદાવાદના આંગણે યોજાઇ ગયો. ઉદ્યોગમાં ઉત્તમ પર્ફોર્મન્સ, કહાની, દિગ્દર્શન અને ટેક્નિક ક્ષેત્રે શાનદાર પ્રદાનને બિરદાવવા માટે ફિલ્મફેર એવોર્ડ્સ એનાયત થાય છે. ખાસ વાત એ છે કે સતત બીજા આ વર્ષે આ શાનદાર ઈવેન્ટ ગુજરાતમાં યોજાઈ છે. ગયા વર્ષે આ એવોર્ડ સમારંભ ગાંધીનગર-અમદાવાદ હાઇ વે પર ‘ગિફ્ટ’ સિટીમાં યોજાઇ હતી અને તેને જબરદસ્ત સફળતા મળી. જ્યારે આ વર્ષે 70મા ફિલ્મફેર એવોર્ડ્સ 2025નું આયોજન અમદાવાદના કાંકરિયા સ્થિત ઇકેએ એરેનામાં કરાયું હતું. સિતારાઓથી સજેલી આ સાંજમાં ગ્લેમર, મનોરંજન અને ઈમોશન્સનો ત્રિવેણીસંગમ રચાયો હતો.
આ ભવ્ય ઈવેન્ટનું હોસ્ટિંગ શાહરુખ ખાન, કરણ જોહર અને મનીષ પોલે કર્યું હતું. રેડ કાર્પેટ પર સિતારાઓની ધૂમ હતી અને સ્ટેજ પર અક્ષય કુમાર, અનન્યા પાંડે સહિત અનેક કલાકારોએ શાનદાર પર્ફોર્મન્સ આપ્યા હતા. ચારેબાજુ માત્ર સિતારાઓની ચમક અને તાળીઓની ગુંજ સંભળાઈ હતી. આ વર્ષ ફિલ્મફેર એવોર્ડ્સ એક્ટિગ, ડિરેક્શન અને મ્યુઝિકમાં શાનદાર કામ કરનાર કલાકારોને સન્માનિત કર્યા હતા. ખાસ વાત એ રહી કે બેસ્ટ એક્ટરનો એવોર્ડ આ વખતે બે એક્ટર્સને મળ્યો - કાર્તિક આર્યન અને અભિષેક બચ્ચન. જ્યારે બેસ્ટ એક્ટ્રેસનો એવોર્ડ આલિયા ભટ્ટને મળ્યો હતો.
•••
ફિલ્મફેર એવોર્ડ્સ વિજેતાઓ
બેસ્ટ ફિલ્મ: ‘લાપતા લેડીઝ’
બેસ્ટ ડાયરેક્ટર: કિરણ રાવ (‘લાપતા લેડીઝ’)
બેસ્ટ ફિલ્મ (ક્રિટિક્સ): ‘આઈ વોન્ટ ટુ ટોક’ (શૂજીત સરકાર)
બેસ્ટ એક્ટરઃ અભિષેક બચ્ચન (‘આઈ વોન્ટ ટુ ટોક’) અને કાર્તિક આર્યન (‘ચંદુ ચેમ્પિયન’)
બેસ્ટ એક્ટર (ક્રિટિક્સ): રાજકુમાર રાવ (‘શ્રીકાંત’)
બેસ્ટ એક્ટ્રેસ: આલિયા ભટ્ટ (‘જિગરા’)
બેસ્ટ એક્ટ્રેસ (ક્રિટિક્સ): પ્રતિભા રાંતા (‘લાપતા લેડીઝ’)
બેસ્ટ સપોર્ટિંગ એક્ટર: રવિ કિશન (‘લાપતા લેડીઝ’)
બેસ્ટ સપોર્ટિંગ એક્ટ્રેસ: છાયા કદમ (‘લાપતા લેડીઝ’)
બેસ્ટ મ્યુઝિક આલ્બમ: રામ સંપત (‘લાપતા લેડીઝ’)
બેસ્ટ સોંગ: પ્રશાંત પાંડે (‘સજની...’ - ‘લાપતા લેડીઝ’)
બેસ્ટ પ્લેબેક સિંગર (મેલ): અરિજિત સિંહ (‘સજની...’ - ‘લાપતા લેડીઝ’)
બેસ્ટ પ્લેબેક સિંગર (ફિમેલ): મધુબંતી બાગચી (આજ કી રાત... - ‘સ્ત્રી-ટુ’)
બેસ્ટ ડેબ્યુ ડિરેક્ટર: આદિત્ય સુહાસ જાંભલે (‘આર્ટિકલ 300’) - કુણાલ ખેમૂ (‘મડગાંવ એકસપ્રેસ’)
બેસ્ટ ડેબ્યુ (મેલ): લક્ષ્ય (‘કિલ’)
બેસ્ટ ડેબ્યુ (ફિમેલ): નિતંશી ગોએલ (‘લાપતા લેડીઝ’)
લાઈફટાઈમ અચીવમેન્ટ એવોર્ડઃ ઝીનત અમાન અને શ્યામ બેનેગલ (મરણોત્તર)
આર.ડી. બર્મન એવોર્ડ ફોર અપકમિંગ ટેલેન્ટ ઈન મ્યુઝિક: અચિંત ઠક્કર (‘જિગરા, ‘મિસ્ટર એન્ડ મિસિસ માહી’)
