ફોર્ચ્યુન ઇંડિયા વેલ્યુએબલ સેલિબ્રિટીઝ લિસ્ટમાં બોલિવૂડનો દબદબો

‘ફોર્ચ્યુન ઈન્ડિયા’ દર વર્ષે વેલ્યુએબલ સેલિબ્રિટીઝનું લિસ્ટ જાહેર કરે છે. આ વખતે આ લિસ્ટમાં પહેલા નંબર પર ક્રિકેટર વિરાટ કોહલી છે, તેની બ્રાન્ડ વેલ્યુ 3,542 કરોડ રૂપિયા આંકવામાં આવી છે. જોકે તેને બાદ કરતાં લિસ્ટમાં બોલિવૂડનો દબદબો જોવા મળે છે.
‘ફોર્ચ્યુન ઈન્ડિયા’ના ટોપ- 25 વેલ્યુએબલ સેલિબ્રિટીઝના લિસ્ટમાં શાહરૂખ ખાન બીજા ક્રમે છે. હાલ તે પોતાની અપકમિંગ ફિલ્મ ‘કિંગ’ના શૂટિંગમાં વ્યસ્ત છે. તો દેસી ગર્લ પ્રિયંકા ચોપરાને આ લિસ્ટમાં ત્રીજું સ્થાન મળ્યું છે. પ્રિયંકા ચોપરાના કરિયર ફ્રન્ટની વાત કરીએ તો તે આ દિવસોમાં હોલિવૂડમાં એક્ટિંગ કરી રહી છે અને ફિલ્મો પ્રોડ્યુસ કરી રહી છે. સાથે જ એસ.એસ. રાજામૌલીની ફિલ્મ ‘વારાણસી’ના શૂટિંગ માટે પણ તે સમયાંતરે ભારત આવતી રહી છે.
આ ઉપરાંત લિસ્ટમાં પાંચમા નંબર પર રણવીર સિંહ સામેલ છે. ધુરંધર ફ્રેન્ચાઇઝીની ફિલ્મો કર્યા પછી તેની બ્રાન્ડ વેલ્યુ ઘણી વધી ગઈ છે. તેની ફિલ્મ ‘ધુરંધર-2’ એ બોક્સ ઓફિસ પર 1000 કરોડ રૂપિયાથી વધુની કમાણી કરી છે. આવું કરનારી આ પહેલી બોલિવૂડ ફિલ્મ છે.
ફોર્ચ્યુન ઇન્ડિયાના ટોપ 25 વેલ્યુએબલ સેલિબ્રિટીઝના લિસ્ટમાં અક્ષય કુમાર છઠ્ઠા નંબર પર છે. તાજેતરમાં જ તેમની ફિલ્મ ‘ભૂત બંગલા’ રિલીઝ થઈ છે, ટૂંક સમયમાં જ તે એક ફિલ્મ ‘હૈવાન’માં જોવા મળશે. ફોર્ચ્યુન ઈન્ડિયાના રેન્કિંગ લિસ્ટમાં 7મા નંબર પર અમિતાભ બચ્ચન છે. જ્યારે 9મા નંબર પર આલિયા ભટ્ટ અને 10મા નંબરે અલ્લુ અર્જુન છે. ટોપ-25માં દીપિકા પાદુકોણ 11મા નંબરે તો રશ્મિકા મંદાના 17મા નંબરે છે. આ લિસ્ટમાં ક્રિતી સેનન, નયનતારા, દિલજીત દોસાંઝ અને અરિજિત સિંહ વગેરેના નામ જોવા મળે છે.