સમગ્ર દેશમાં ચર્ચાનો વિષય બની ગયેલું સોંગ ‘બચપન કા પ્યાર...’ને બોલિવૂડ સિંગર બાદશાહે રિક્રિયેટ કરીને ૧૧ ઓગસ્ટે રિલીઝ કર્યું છે. આ સોંગ સોશિયલ મીડિયામાં વાઈરલ થયું ત્યારે જ બાદશાહે આ ગીત ગાનાર સહદેવના નામના બાળક સાથે મળીને આ ગીતને રિક્રિયેટ કરવાની જાહેરાત કરી હતી. આ યંગ સિંગર છત્તીસગઢના સુકમા જિલ્લામાંથી આવે છે. ઓરિજિનલ ‘બચપન કા પ્યાર...’ ગીત ૨૦૧૮માં રિલીઝ થયું હતું અને એણે યૂટ્યૂબ પર ૨.૬ મિલિયન વ્યૂઝ મેળવ્યા હતા. જોકે, સહદેવે રિસન્ટલી આ સોંગને ગાયા પછી એ વધારે પોપ્યુલર થયું હતું. આ પછી બાદશાહે આ બાળ સિંગર સાથેનો એક ફોટોગ્રાફ ઇન્સ્ટાગ્રામ પર પોસ્ટ કરીને લખ્યું હતું કે, ‘બચપન કા પ્યાર, કમિંગ સૂન.’ અને ચાહકોએ તેની જાહેરાતને વધાવી લીધી હતી. હવે બાદશાહે ગીતને એક નવા જ અંદાજમાં સોશિયલ મીડિયા યૂઝર્સ સામે મૂક્યું છે. ગીતમાં બાદશાહ અને સહદેવનો સ્વેગ લોકોને ખૂબ પસંદ આવી રહ્યો છે. ગીત રિલીઝ થયાના ચાર જ કલાકમાં તેને ૩૮ લાખ વ્યૂઝ મળ્યા હતા, અને આંકડો વધી જ રહ્યો છે. સોંગમાં નાના બાળક અને યંગસ્ટર્સની લવસ્ટોરી દેખાડવામાં આવી છે, જેમાં સહદેવના અનોખા ડાન્સ સાથે બાદશાહનું રેપિંગ પણ સોશિયલ મીડિયા યૂઝર્સને ખૂબ પસંદ આવી રહ્યું છે.
