યામી ગૌતમ અને આદિત્ય ધરનું હિમાચલ પ્રયાણ

અભિનેત્રી યામી ગૌતમ અને ફિલ્મ નિર્માતા પતિ આદિત્ય ધરે મુંબઈની ઝાકઝમાળથી દૂર રહીને હિમાચલ પ્રદેશને પોતાનું કાયમી નિવાસ સ્થાન બનાવ્યું છે. અંગત જીવનને હંમેશા લાઈમલાઈટથી દૂર રાખનાર આ દંપતી હવે કામકાજ અર્થે જ મુંબઈ આવશે. શાંત અને કુદરતી વાતાવરણમાં રહેવાનો તેમનો આ નિર્ણય સાદગીભરી જીવનશૈલી દર્શાવે છે.
હિમાચલ પ્રદેશના મંડી જિલ્લાના ગોહરમાં 25 એકરમાં ફેલાયેલું આ 100 વર્ષ જૂનું હેરિટેજ ઘર યામી માટે ખૂબ જ ખાસ છે. તેમના બાળપણની યાદો સાથે જોડાયેલી આ પ્રોપર્ટી પર લાકડા અને પથ્થરથી બનેલું મકાન છે, જ્યાં સફરજન, પ્લમ અને આદુની ખેતી થાય છે. જૂન 2021માં દંપતીના લગ્ન પણ અહીં જ થયા હતા. અગાઉ મુંબઈના ખાર વિસ્તારમાં ભાડાના મકાનમાં રહેતા આ દંપતીએ પોતાના પહાડી ઘરને વધુ પડતુ આધુનિક બનાવવાની બદલે પરંપરાગત રાખ્યું છે.
તાજેતરમાં ફિલ્મ ‘આર્ટિકલ 370’ માટે રાષ્ટ્રીય પુરસ્કાર મેળવનાર આ જોડી પોતાની ફિલ્મો, શૂટિંગ અને જાહેર કાર્યક્રમો સિવાયનો સમય મોટાભાગે આ હરિયાળા અને શાંત વાતાવરણ વચ્ચે વિતાવવાનું પસંદ કરે છે.