‘કાન્સ ફિલ્મ ફેસ્ટિવલ’માં ‘હેલ્લારો’

૨૦૧૯માં આવેલી ગુજરાતી ફિલ્મ ‘હેલ્લારો’ને ભારત સરકારે કાન્સ ફિલ્મ ફેસ્ટિવલમાં દર્શાવવા માટે પસંદ કરી છે. કેન્દ્રિય સૂચના-પ્રસારણ પ્રધાન પ્રકાશ જાવડેકરે કાન્સ ફિલ્મ ફેસ્ટિવલમાં ભારતના પેવેલિયનનું વર્ચ્યુઅલી ઉદ્ધાટન કર્યું હતું. ગુજરાતી યુવક અભિષેક શાહે બનાવેલી અને મહિલા સશક્તિકરણની કથા રજૂ કરતી આ ફિલ્મ ભારતમાં નેશનલ સહિત ઘણા એવોર્ડ જીતી ચૂકી છે. ફ્રાન્સના કેન શહેરમાં સાત દાયકાથી ફિલ્મ ફેસ્ટિવલ યોજાય છે. આ વખતે ૭૩મો ફેસ્ટિવલ યોજાઈ રહ્યો છે. આ ફેસ્ટિવલમાં દર્શાવવા માટે દુનિયાભરમાંથી ફિલ્મો આવતી હોય છે. તેમાં ભારતીય ફિલ્મો તો લગભગ દર વર્ષે દર્શાવવામાં આવે જ છે, પરંતુ ગુજરાતી ફિલ્મ પસંદ થયાની ઘટના ઐતિહાસિક છે. ફેસ્ટિવલના ટાઈમટેબલ પ્રમાણે ૨૬મી તારીખે આ ફિલ્મ રજૂ કરવામાં આવી હતી. ભારતમાંથી કુલ બે ફિલ્મ પસંદ થઈ છે, જેમાં બીજી ફિલ્મ મરાઠી ભાષાની માઈ ઘાટ છે. આ ફેસ્ટિવલમાં વિવિધ ફિલ્મોને વિવિધ કેટેગરીમાં એવોર્ડ આપવામાં આવે છે. હેલ્લારો એવી કોઈ કેટેગરી માટે પસંદ નથી થઈ, માત્ર ત્યાં સ્ક્રિનિંગ માટે સિલેક્ટ થઈ છે.