‘ધૂરંધર-2’ સૌથી વધુ કમાણી કરનારી બોલિવૂડ ફિલ્મ

રણવીર સિંહની ‘ધુરંધર: ધ રિવેન્જ’એ ઇતિહાસ રચ્યો છે, કારણ કે તે ભારતીય બોક્સઓફિસ પર 800 કરોડ રૂપિયાની નેટ ક્લબમાં પ્રવેશ કરનારી પ્રથમ બોલિવૂડ ફિલ્મ બની છે. ‘ધુરંધર: ધ રિવેન્જ’ બોક્સ ઓફિસ પર તેની ઐતિહાસિક દોડ સાથે સતત ધૂમ મચાવી રહી છે. રણવીર સિંહ અભિનીત આ ફિલ્મે ભારતીય બોક્સ ઓફિસ પર 812 કરોડ રૂપિયા કરતાં વધુ નેટ કમાણી કરી લીધી છે, જેમાંથી માત્ર હિન્દી વર્ઝનમાંથી 766.50 કરોડ રૂપિયા નેટ કમાણી કરી છે, જ્યારે દક્ષિણ ભારતીય ડબ્ડ વર્ઝનમાંથી અત્યાર સુધી 45.50 કરોડ રૂપિયાનો ફાળો મળ્યો છે. આ પ્રકારની કમાણી સાથે, આ સ્પાય એક્શન ડ્રામા ભારતમાં 800 કરોડ રૂપિયા નેટનો આંક પાર કરનારી પ્રથમ બોલિવૂડ ફિલ્મ બની છે. પ્રથમ ભાગ ‘ધુરંધર’ 800 કરોડ રૂપિયા નેટ કમાણીની નજીક પહોંચી હતી પરંતુ 10 કરોડથી ચૂકી ગઈ હતી. ‘ધુરંધર’એ તેની 100 દિવસથી વધુની સંપૂર્ણ થિએટર રન દરમિયાન નેશનલ બોક્સ ઓફિસ પર આશરે 789.50 કરોડ રૂપિયા નેટ કમાણી કરી હતી. ‘ધુરંધર’થી એક ડગલું આગળ વધીને તેના બીજા ભાગને દક્ષિણમાં તમિલ, તેલુગુ, કન્નડ અને મલયાલમમાં ડબ્ડ વર્ઝનમાં રિલીઝ કરવાથી વધુ ફાયદો મળ્યો છે, સાથે સાથે પેઇડ પ્રિવ્યુઝનો પણ લાભ મળ્યો છે. ‘ધુરંધર: ધ રિવેન્જ’એ આ ઐતિહાસિક માઇલસ્ટોન ફક્ત 13 દિવસમાં હાંસલ કરી લીધો. હવે તે તેના થિયેટ્રિકલ રનના અંત સુધી ભારતમાં 1000 કરોડ રૂપિયા નેટ પાર કરવાની દિશામાં આગળ વધી રહી છે, જે તેની આગામી દિવસોની કમાણી પર નિર્ભર રહેશે.