ન્યૂ યોર્ક: યુએસ ઓપનના મેન્સ સિંગલ્સના ફાઇનલ મુકાબલામાં સ્વિત્ઝર્લેન્ડના રોજર ફેડરરને હરાવીને સર્બિયન ખેલાડી નોવાક જોકોવિચે ટાઇટલ કબ્જે કર્યું છે. જોકોવિચે ફેડરરને ૬-૪, ૫-૭, ૬-૪, ૬-૪થી હરાવીને યુએસ ઓપનમાં બીજું ગ્રાન્ડ સ્લેમ જીતવાની સાથે સાથે સ્વીસ ખેલાડી ફેડરરનું ૧૮મું ગ્રાન્ડ સ્લેમ જીતવાનું સ્વપ્ન પણ રોળી નાંખ્યુ છે.
આ પહેલાં બંને વિમ્બલ્ડનની ફાઇનલમાં ટકરાયા હતા ત્યારે પણ જોકોવિચે ફેડરરને હરાવીને ટાઇટલ જીત્યું હતું. આ સાથે નોવાક જોકોવિચે યુએસ ઓપનમાં બીજું અને કારકિર્દીનું ૧૦મું ટાઇટલ જીત્યું છે. જોકોવિચ યુએસ ઓપનમાં ચાર વખત રનર-અપ રહી ચૂક્યો છે. ટાઇટલ જીતનાર નોવાક જોકોવિચને ૩૩ લાખ ડોલરની પ્રાઇસ મની મળી હતી. ફાઇનલ મુકાબલા પહેલાં વરસાદ શરૂ થતાં મેચ ત્રણ કલાક વિલંબથી શરૂ થઇ હતી. ઉલ્લેખનીય છે કે, આ પહેલાં જોકોવિચ ૨૦૧૧માં યુએસ ઓપનમાં ચેમ્પિયન બન્યો હતો.
૧૭ ગ્રાન્ડ સ્લેમ જીતનાર રોજર ફેડરર છ વર્ષ બાદ યુએસ ઓપનની ફાઇનલમાં પહોંચ્યો હતો. યુએસ ઓપનમાં પાંચ ગ્રાન્ડ સ્લેમ જીતનાર ફેડરરને અહીં છઠ્ઠું ટાઇટલ જીતવાની આશા હતી. જોકોવિચ આ વર્ષે જોરદાર ફોર્મમાં જોવા મળી રહ્યો છે. જોકોવિચ આ વર્ષે ચારેય ગ્રાન્ડ સ્લેમની ફાઇનલમાં પહોંચ્યો હતો જ્યાં ઓસ્ટ્રેલિયન ઓપન, વિમ્બલ્ડન અને યુએસ ઓપનનું ટાઇટલ જીત્યું હતું જ્યારે ફ્રેન્ચ ઓપનની ફાઇનલમાં વાવરિંકા સામે હારી ગયો હતો.