જોહાનિસબર્ગઃ ક્રિકેટ સાઉથ આફ્રિકા (સીએસએ)ના વાર્ષિક પુરસ્કાર સમારંભમાં ઝડપી બોલર કાંગિસો રબાડાએ વિવિધ કેટેગરીમાં છ એવોર્ડ મેળવીને અનોખી ‘સિક્સર’ ફટકારી છે. તેણે ક્રિકેટર ઓફ ધ યર સહિત કુલ છ એવોર્ડ પોતાના નામે કર્યા હતા. યુવા ઝડપી બોલર રબાડાએ સીએસએના ક્રિકેટર ઓફ ધ યર, ટેસ્ટ ક્રિકેટર ઓફ ધ યર, વન-ડે ક્રિકેટર ઓફ ધ યર, પ્લેયર્સ ઓફ ધ યર, ફેન્સ પ્લેયર ઓફ ધ યર અને ટી૨૦ ડિલીવરી ઓફ ધ યરના પુરસ્કારથી નવાજવામાં આવ્યો હતો.
રબાડા એવો પહેલો ક્રિકેટર છે જેણે વિવિધ કેટેગરીમાં એક સાથે છ એવોર્ડ જીત્યા હોય. આ પહેલા એબી ડી’ વિલિયર્સ અને હાશિમ અમલા પાંચ-પાંચ એવોર્ડ જીતી ચૂક્યા છે. રબાડા ક્રિકેટર ઓફ ધ યરનો પુરસ્કાર જીતનારો સૌથી યુવા ખેલાડી પણ બન્યો છે. લેગ સ્પિનર ઇમરાન તાહિરને ટી૨૦ ક્રિકેટ ઓફ ધ યરનો પુરસ્કાર અપાયો હતો.
