અમદાવાદ: ભારતમાં લાંબા સમયના અંતરાલ બાદ કાર્તિક માસની દેવઉઠી એકાદશીથી લગ્નસિઝન શરૂ થઈ ગઇ છે. નવરાત્રીના તહેવારોમાં જીએસટીમાં સરકારની રાહત બાદ બજારોમાં ભારે ખરીદીનો માહોલ જોવા મળ્યો હતો અને દિવાળીના તહેવારો પણ ભારતીય વેપારી વર્ગ માટે સારા રહ્યા હોવાના આંકડા બહાર આવી રહ્યાં છે. અને હવે આ તેજીનો માહોલ લગ્નસરાની દોઢ મહિનાની સિઝનમાં પણ ચાલુ રહેવાનો અંદાજ વેપારી એસોશિયેશને મુક્યો છે.
કન્ફેડરેશન ઓફ ઓલ ઈન્ડિયા ટ્રેડર્સના અહેવાલ મુજબ ભારતીય લગ્નસરાની મોસમમાં રૂ. 6.5 લાખ કરોડનો ધંધો થવાનો| અંદાજ છે. આ અંદાજિત કુલ રકમ અગાઉની તુલનાત્મક સિઝન કરતાં 10 ટકા વધુ છે, જેમાં 48 લાખ લગ્નો અને રૂ. 5.90 લાખ કરોડનો લગ્નો પાછળ ખર્ચ થયો હતો. ઉદ્યોગ સંગઠને અહેવાલ આપ્યો છે કે આ વર્ષે 2025ની આ છેલ્લી સિઝનના 45 દિવસમાં સમગ્ર ભારતમાં 46 લાખ લગ્નોનો અંદાજ છે. એકમાત્ર દિલ્હીમાં જ આ સિઝન દરમિયાન 4.8 લાખ લગ્નો થવાની સંભાવના છે અને તેમાં રૂ. 1.8 લાખ કરોડનો ધંધો થવાની ધારણા છે. સીએઆઈટીએ દ્વારા આ અભ્યાસ 15 ઓક્ટોબરથી 25 ઓક્ટોબર, 2025 દરમિયાન 75 મુખ્ય શહેરોમાં હાથ ધરાયો હતો. વર્ષ 2023માં 38 લાખ લગ્નો થયા હતા અને રૂ. 4.74 લાખ કરોડનો બિઝનેસ થયો હતો. જ્યારે, 2022માં 32 લાખ લગ્નો થયા હતા જેમાં કુલ રૂ. 3.75 લાખ કરોડનો ખર્ચ થયો હતો.
