વોશિંગ્ટનઃ અમેરિકાના વર્જિનિયા બીચ મ્યુનિસિપલ સેન્ટરમાં ફરજ બજાવતા એક નારાજ કર્મચારીએ પહેલી જૂને ઓફિસમાં અંધાધૂધ ફાયરિંગ કરતાં ૧૨ કર્મચારીઓનાં મોત થયાં છે. પોલીસના કહેવા પ્રમાણે, ફાયરિંગ કરનારનું પણ આ ઘટનામાં મોત થયું છે અને એક પોલીસકર્મી પણ આ ઘટનામાં ઘાયલ થયો છે. આ ઓફિસમાં લગભગ ૪૦૦ કર્મચારીઓ ફરજ બજાવે છે.
પોલીસે વધુમાં કહ્યું કે, કર્મચારીએ ફાયરિંગ કર્યું ત્યારે કેટલાક કર્મચારીઓએ ટેબલ નીચે છુપાઈને બચવાની કોશિશ કરી હતી. બૂમરાણ વચ્ચે હુમલાખોર કર્મચારીએ પહેલા એ વ્યક્તિને ગોળી મારી હતી જે ઓફિસની બહાર વાહન પર સવાર હતો. એ પછી તે ઓફિસમાં આવ્યો હતો અને ગોળીઓનો વરસાદ શરૂ કરી દીધો હતો.
આ પહેલા ફેબ્રુઆરી મહિનામાં પણ અમેરિકાના ઈલિનોઈસ રાજ્યમાં નોકરીમાંથી કાઢી મુકાયેલા કર્મચારીએ પાંચ પૂર્વ સહકર્મચારીઓની ગોળી મારીને હત્યા કરી દીધી હતી.