વોશિંગ્ટનઃ ભારતીય-અમેરિકન મૂળના અરવિંદ શ્રીનિવાસની આગેવાની હેઠળની એઆઇ કંપની પરપ્લેક્સિટીએ ગૂગલના ક્રોમ બ્રાઉઝરને ખરીદવા માટે 34.5 બિલિયન ડોલર (આશરે 3.02 લાખ કરોડ રૂપિયા)ની જંગી ઓફર કરીને અમેરિકાના આર્થિક જગતમાં હલચલ મચાવી દીધી છે. અરવિંદ શ્રીનિવાસના ત્રણ વર્ષ જૂના આ સ્ટાર્ટ-અપનું વેલ્યુએશન માત્ર 18 બિલિયન ડોલર છે, પરંતુ તેને 34.5 બિલિયન ડોલરના રોકડ સોદામાં ક્રોમ બ્રાઉઝર ખરીદવાની સાહસિક બિડ કરી છે.
ક્રોમ વિશ્વભરમાં ત્રણ બિલિયનથી વધુ યુઝર્સ ધરાવે છે. એઆઇ આધારિત સર્ચ એન્જિનમાં પ્રભુત્વ માટેની તીવ્ર રેસ ચાલે છે ત્યારે ક્રોમ એક મહત્ત્વની એસેટ છે. પરપ્લેક્સિટીના ચીફ બિઝનેસ ઓફિસર દિમિત્રી શેવેલેન્કોએ જણાવ્યું હતું કે મોટી સંખ્યામાં મોટા ઇન્વેસ્ટમેન્ટ ફંડ્સ આ ટ્રાન્ઝેક્શન માટે ફાઇનાન્સ કરવા સંમત થયા છે. કંપનીએ એનવીડિયા અને જાપાનની સોફ્ટબેન્ક સહિતના મુખ્ય રોકાણકારો પાસેથી અત્યાર સુધીમાં લગભગ 1 અબજ ડોલર એકત્ર કર્યા છે.
પરપ્લેક્સિટીની ઓફર માત્ર 34.5 બિલિયન ડોલર સુધી સીમિત નથી. આ સ્ટાર્ટઅપે ક્રોમ ડેવલપમેન્ટ અને ઇન્ફ્રાસ્ટ્રક્ચર સુધારા માટે બે વર્ષમાં 3 બિલિયન ડોલરનું રોકાણ કરવાની પણ પ્રતિબદ્ધતા વ્યક્ત કરી છે.
પરપ્લેક્સિટીએ કરેલી આ ઓફરનો સમય પણ મહત્ત્વપૂર્ણ છે. અમેરિકામાં ફેડરલ જજે ગયા વર્ષે ચુકાદો આપ્યો હતો કે ગૂગલ ઇન્ટરનેટ સર્ચ ક્ષેત્રમાં ગેરકાયે મોનોપોલી ધરાવે છે. તેથી ગૂગલે તેની મોનોપોલીનો અંત લાવવા માટે ક્રોમનું વેચાણ કરવાની ફરજ તેવી શક્યતા છે. યુએસ ડિસ્ટ્રિકટ જજ અમિત મહેતા મોનોપોલી બદલ ગૂગલને આગામી થોડા દિવસોમાં જંગી પેનલ્ટી ફટકારે તેવી શક્યતા છે.
