નવી દિલ્હી: અમેરિકાની ટંકશાળે 232 વર્ષ બાદ પેનીનું ઉત્પાદન બંધ કરી દીધું છે. જે રીતે ભારતમાં 80-90ના દશકમાં પૈસાનું ચલણ હતું તેવી જ રીતે અમેરિકામાં પેની એટલે કે એક સેન્ટના સિક્કા અત્યાર સુધી ચાલતા હતા. રૂપિયામાં 100 પૈસા હોય છે તેમ ડોલરમાં 100 સેન્ટ હોય છે. પેની 1793માં પહેલી વખત અમેરિકામાં બનતી હતી. ત્યારે એક પેનીથી એક બિસ્કીટ, મીણબત્તી અથવા કેન્ડી ખરીદી શકાતી હતી. જોકે, હવે પેની મળતી નથી અથવા તો ભંગારમાં પડી રહે છે. અધિકારીઓના કહેવા પ્રમાણે મોટાભાગની પેનીનો ઉપયોગ બંધ થયો છે. અંતિમ વખત સિક્કા બનાવતા સમયે ટંકશાળના કર્મચારીઓ ફેક્ટરીમાં ચુપચાપ ઊભા રહ્યા હતા. જાણે તેઓ કોઈ જૂના મિત્રને વિદાય આપી રહ્યા હતા. જ્યારે ટંકશાળમાંથી અંતિમ વખત પેની બનીને બહાર આવી ત્યારે કર્મચારીઓએ તાળીઓ પાડીને આ પળને વધાવી હતી.
