વોશિંગ્ટન
અમેરિકાના પ્રમુખ જો બાઇડેને યુએસ ડિપાર્ટમેન્ટ ઓફ ટ્રાન્સપોર્ટેશનના ફેડરલ હાઇવે એડમિનિસ્ટ્રેશનના એડમિનિસ્ટ્રેટર તરીકે ભારતીય મૂળના અમેરિકન શૈલન પી ભટ્ટની નિયુક્તિ જાહેર કરી છે. ટ્રાન્સપોર્ટ એક્સપર્ટ તરીકે જાણીતા શૈલન ભટ્ટ ગવર્મેન્ટ અને પ્રાઇવેટ સેક્ટરમાં વિવિધ ઉચ્ચ હોદ્દાઓ પર કામગીરી બજાવી ચૂક્યા છે. સપ્ટેમ્બર 2021થી તેઓ મલ્ટીનેશનલ ઇન્ફ્રાસ્ટ્રક્ચર કન્સલ્ટિંગ ફર્મ એઇસીઓએમ ખાતે વાઇસ પ્રેસિડેન્ટ તરીકે ફરજ બજાવી રહ્યા હતા. તે પહેલાં તેઓ કોલોરાડો ડિપાર્ટમેન્ટ ઓફ ટ્રાન્સપોર્ટેશનના એક્ઝિકયુટિવ ડિરેક્ટર કરીકે ફરજ બજાવી ચૂક્યા છે.
વ્હાઇટ હાઉસની અખબારી યાદીમાં જણાવ્યા અનુસાર શૈલન ભટ્ટ 21મી સદીમાં કોસ્ટ ઇફેક્ટિવ ટ્રાન્સપોર્ટેશન સિસ્ટમ માટે વિવિધ સમાશોધિત ઉકેલો લાવ્યા છે. વેસ્ટર્ન કેન્ટુકી યુનિવર્સિટીમાંથી ઇકોનોમિક્સમાં સ્નાતક શૈલન ભટ્ટ આ નિયુક્ત માટે સહમત થશે તો તેઓ બાઇડેન અને કમલા હેરિસની સરકારમાં મહત્વની જવાબદારી નિભાવતી ભારતીય મૂળના ઇન્ડિયનોની ટીમમાં સામેલ થઇ જશે.