મસ્કે જેમને ‘ઝેરી સાપ’ ગણાવ્યા ટ્રમ્પે તેમને ભારતના રાજદૂત બનાવ્યા

વોશિંગ્ટન: રશિયન મૂળના સર્જિયો ગોર ભારતમાં અમેરિકાના રાજદૂત બનશે. પ્રેસિડન્ટ ટ્રમ્પે સોશિયલ મીડિયા પ્લેટફોર્મ પર લખ્યું, ગોર ભારતમાં રાજદૂત અને દક્ષિણ અને મધ્ય એશિયા માટે ખાસ દૂત રહેશે. ગોર એવા સમયે રાજદૂત બની રહ્યા છે જ્યારે ભારત અને અમેરિકા વચ્ચે ટેરિફને લઈને તણાવ ચરમસીમાએ છે. બીજી તરફ, ભારત-ચીન સંબંધો વધુ મજબૂત બની રહ્યા છે. ગોર હાલમાં ટ્રમ્પના રાષ્ટ્રપતિ કર્મચારી વિભાગના ડિરેક્ટર છે. તેમની નિમણૂકને સેનેટ દ્વારા હજુ સુધી મંજૂરી અપાઇ નથી. જોકે, ગોરની કાર્યશૈલી વિવાદાસ્પદ રહી છે. આ વર્ષની શરૂઆતમાં ટેસ્લાના સીઈઓ એલન મસ્ક સાથે ટ્રમ્પના મુકાબલામાં પણ ગોરે ભૂમિકા ભજવી હતી. મસ્કે ગોરને ‘ઝેરી સાપ’ પણ કહ્યા હતા. વહીવટી નિમણૂકો માટે તપાસ કરવામાં આવી હોવા છતાં ગોરે સુરક્ષા મંજૂરી સંબંધિત તેમના દસ્તાવેજો બતાવ્યા ન હતા. સર્જિયો ગોરને ટ્રમ્પનો જમણો હાથ કહેવામાં આવે છે. 30 નવેમ્બર 1986ના રોજ તાશ્કંદ (ઉઝબેકિસ્તાન, તે સમયે સોવિયેત યુનિયનનો ભાગ)માં જન્મેલા ગોરે 2024ની રાષ્ટ્રપતિની ચૂંટણી પહેલા ટ્રમ્પના પ્રચારની રાજકીય કાર્યવાહી સમિતિમાં મુખ્ય ભૂમિકા ભજવી હતી. ગોરે તેમનું બાળપણ માલ્ટામાં વિતાવ્યું. પછી પરિવાર અમેરિકા ગયો. તેમણે અમેરિકામાં અભ્યાસ કર્યો. રિપબ્લિકન સર્કલ સેનેટર રેન્ડ પોલ સાથે કામ કરીને તેમની કારકિર્દી શરૂ કરી. પછી 2020માં ટ્રમ્પ સાથે જોડાયા, ત્યારથી તેઓ તેમના નજીકના લોકોમાંના એક છે.