વોશિંગ્ટનઃ અમેરિકાની તપાસ એજન્સી એફબીઆઈએ કેલિફોર્નિયામાં મોટા ક્રિપ્ટો કરન્સી કૌભાંડનો પર્દાફાશ કર્યો છે. કૌભાંડમાં કેલિફોર્નિયાના કુણાલ મહેતાની ધરપકડ કરાઇ છે. કુણાલે કોર્ટમાં ગુનો કબૂલ કર્યો છે અને જણાવ્યું છે કે તે એક ગુનાહિત ગેંગનો ભાગ હતો. તેણે સોશિયલ એન્જિનિયરિંગ દ્વારા લોકો પાસેથી 2,314 કરોડ રૂપિયાની ક્રિપ્ટો કરન્સીની ઠગાઈ કરી હતી. કુણાલે નકલી કંપનીઓ બનાવી અને ક્રિપ્ટોને રોકડમાં બદલવા માટે 10 ટકા કમિશન લીધું હતું. અમેરિકન એટર્ની જેનિન ફેરિસ પિરોના જણાવ્યા મુજબ, 13 લોકોના ગેંગમાંથી કુણાલ આઠમો સભ્ય છે, જેણે ગુનો કબૂલ કર્યો છે. કેલિફોર્નિયામાં કુણાલને ‘શ્રેક’ અને ‘ધ એકાઉન્ટન્ટ’ જેવા ઉપનામોથી ઓળખવામાં આવે છે.
આ કાવતરાની શરૂઆત ઓક્ટોબર 2023માં ઓનલાઇન ગેમિંગ દ્વારા કરાઇ હતી. ગેંગમાં હેકર્સ, પ્લાનર્સ અને ઘરોમાં ઘુસીને હાર્ડવેર ક્રિપ્ટો વોલેટ ચોરનાર ચોરો પણ સામેલ હતા. આ નેટવર્કે કેલિફોર્નિયા, ફ્લોરિડા, ન્યૂયોર્ક, કનેક્ટિકટ જેવા રાજ્યો અને અનેક દેશોમાં ગુનાઓને અંજામ આપ્યો હતો. આ નેટવર્ક માર્ચ 2025 સુધી સક્રિય હતું.
ઠગાઈના પૈસાથી મોજ-શોખ ને પાર્ટી
કુણાલ મહેતા હિસારના મોડલ ટાઉનનો રહેવાસી છે. તેના પિતા હિસારમાં વીમા એજન્ટ હતા. બાદમાં તેઓ બે પુત્રો સાથે બહેન પાસે અમેરિકા શિફ્ટ થયા. કુણાલના ગેંગે ચોરી કરેલા પૈસા મોંઘી પાર્ટીઓ, લક્ઝરી સામાન, પ્રાઈવેટ જેટ અને લોસ એન્જેલસની ક્લબમાં ઉડાવ્યા હતા.
