બોકારો: પરશુરામ ઉંમર 68 વર્ષ, વ્યવસાયે કડિયા છે. તેઓ પોતે માત્ર પાંચમું ધોરણ પાસ છે પણ આજે 4200 બાળકો તેમનો આભાર માનતા થાકતા નથી, કેમ કે તેમના જીવનમાં શિક્ષણનો ઉજાસ પરશુરામ જ લાવ્યા છે. ઝારખંડના બોકારોમાં સેક્ટર 12-એમાં તેઓ 30 વર્ષથી બિરસા મુંડા ફ્રી સ્કૂલ ચલાવે છે. ઝૂંપડી જેવી આ સ્કૂલમાં આસપાસના રોજમદાર મજૂરો, રિક્ષાચાલકો, ફેરિયાઓના બાળકોને ધો. 7 સુધી મફત ભણાવાય છે. પરશુરામના માતા-પિતા પણ દાડિયા મજૂર હતા. નાણાંભીડને કારણે પરશુરામ પાંચમા ધોરણથી આગળ ભણી ન શક્યા. માતા-પિતા સાથે મજૂરી કરીને કડિયાકામ શીખી લીધું પણ શ્રમિકોના બાળકો કેમ ન ભણી શકે એ સવાલ તેમને કાયમ ખટકતો હતો. તેમણે 1990માં 20 હજાર રૂપિયાની બચતથી ઝૂંપડી જેવી સ્કૂલ શરૂ કરી. પહેલાં તેઓ જાતે બાળકોને ભણાવતા હતા પણ ધીમે-ધીમે બાળકોની સંખ્યા વધીને 60 થયા બાદ એક શિક્ષકની જરૂરિયાત જણાઇ, પરંતુ કોઇ શિક્ષક મફત ભણાવવા માટે તૈયાર નહોતા. આથી પરશુરામે 10 હજાર રૂપિયાના પગારે બે શિક્ષકોને નોકરીએ રાખ્યા.