બેઇજિંગઃ સામાન્ય રીતે રણનું નામ સાંભળતા જ આપણી નજર સામે અફાટ રેતી અને પાણીની તંગીના દ્રશ્યો તરવરી ઉઠે છે, પરંતુ ચીનમાં આવેલું બાદૈન જારન રણ કુદરતની એક અનોખી અજાયબી છે. આ રણ તેની વિશિષ્ટ ભૌગોલિક રચનાને કારણે યુનેસ્કો (UNESCO) દ્વારા વર્લ્ડ હેરિટેજ સાઈટ જાહેર કરવામાં આવ્યું છે.
આ રણની સૌથી મોટી વિશેષતા તેના 500 મીટર સુધીની ઊંચાઈ ધરાવતા રેતીના ઢુવા (ટેકરા) છે, જે વિશ્વમાં સૌથી ઊંચા માનવામાં આવે છે. આ ટેકરાઓ માત્ર ઊંચા જ નથી, પણ ‘વાચાળ’ પણ છે! જ્યારે પવન ફૂંકાય છે અને રેતીના કણો એકબીજા સાથે ઘર્ષણ કરે છે, ત્યારે તેમાંથી એક મધુર સંગીતમય ધ્વનિ ઉત્પન્ન થાય છે. આ જ કારણે તેને ‘સિંગિંગ ડ્યુન્સ’ અથવા ‘ઈકોઇંગ ટેકરા’ તરીકે ઓળખવામાં આવે છે.
બીજી આશ્ચર્યજનક વાત એ છે કે આ સૂકા રણની વચ્ચે આશરે 144 જેટલા તળાવો આવેલા છે. રેતીના વિશાળ પહાડો અને તેની વચ્ચે સ્થિત આ નીલવર્ણી જળાશયોનું દ્રશ્ય પ્રવાસીઓ માટે મંત્રમુગ્ધ કરનારું હોય છે. વૈજ્ઞાનિકો માને છે કે આ તળાવો નીચે રહેલા ભૂગર્ભ જળના સ્રોતને કારણે અસ્તિત્વ ધરાવે છે. આમ, બાદૈન જારન રણ એ રેતી, સંગીત અને પાણીનો એક દુર્લભ સંગમ છે. આશરે 7.26 લાખ હેક્ટરમાં ફેલાયેલું બાદૈન જારન રણ એક વર્લ્ડ હેરિટેજ સાઈટ છે.
