ઉજ્જૈનઃ મધ્યપ્રદેશમાં આવેલા સુપ્રસિદ્ધ ઉજ્જૈન મહાકાલ મંદિરની બહાર હજારો ચપ્પલના ઢગલામાંથી પોતાનાં ખોવાયેલા ચપ્પલ શોધવા માટે એક યુવકે એઆઈ એટલે કે ચેટજીપીટીની મદદ લીધી હતી. ગોવાના રહેવાસી શુભાંગ બોરકરે આ અનોખા પ્રયોગનો વીડિયો સોશિયલ મીડિયા પર શેર કર્યો છે, જે ભારે વાઈરલ થયો છે. મંદિરમાં દર્શન કર્યા પછી બહાર આવ્યો તો શુભાંગને પોતાના ચપ્પલ ન મળ્યા. રેકમાં હજારો ચપ્પલ પડ્યા હતા. આ પછી ટેક્નોલોજીના જાણકાર શુભાંગે ચપ્પલ સ્ટેન્ડની રેકનો વીડિયો અને પોતાના ચપ્પલનો એક સ્પષ્ટ ફોટો ચેટજીપીટી પર અપલોડ કરી દીધો. થોડીક જ ક્ષણોમાં એઆઈએ ચપ્પલની રેકના અલગ-અલગ ફોટા સ્કેન કરીને ચોક્કસ લોકેશન બતાવ્યું કે, રેકની જમણી બાજુએ નીચેના ભાગમાં તેના ચપ્પલ પડેલાં છે. શુભાંગે ત્યાં જઈને જોયું તો ખરેખર તેને ચપ્પલ મળી ગયા હતાં.
