સ્પ્રિન્ગફિલ્ડઃ કોઇ તમને કહે કે લો પ્લાસ્ટિકની બોટલમાંથી બનેલા આ બિસ્કિટ ખાવ..! તો તમારો પહેલો પ્રતિભાવ શું હશે? પ્લાસ્ટિક બોટલમાંથી બનેલી કૂકી ખાવાનો વિચાર ભલે તમને અજીબ કે માન્યામાં ન આવે તેવો લાગે, પણ વૈજ્ઞાનિકો આ વાતને હકીકતમાં બદલવાની તૈયારી કરી રહ્યા છે. કાર્બનડેલમાં આવેલી સધર્ન ઇલિનોય યુનિવર્સિટીના વૈજ્ઞાનિકોએ એક અનોખી તકનીક વિકસાવી છે, જેના દ્વારા પીઇટી પ્લાસ્ટિકને ખાવા યોગ્ય પૌષ્ટિક આહારમાં રૂપાંતરિત કરી શકાય છે.
આ પ્રક્રિયામાં પ્લાસ્ટિકને પાણી અને ઓક્સિજનની મદદથી ઉચ્ચ તાપમાન તથા દબાણ હેઠળ નાના કાર્બન સંયોજનોમાં તોડવામાં આવે છે. ત્યારબાદ જીનેટિકલી મોડિફાઈડ યીસ્ટનો ઉપયોગ કરીને આ સંયોજનોને પ્રોટીન, ફેટ અને અન્ય જરૂરી પોષક તત્વોમાં બદલવામાં આવે છે. છેલ્લે, આ મિશ્રણમાં સ્ટાર્ચ ઉમેરીને થ્રી-ડી પ્રિન્ટર વડે બિસ્કિટ અથવા કૂકીનો આકાર અપાય છે.
આ પ્રોજેક્ટ ‘નાસા’ની ડીપ સ્પેસ ફૂડ ચેલેન્જનો એક મહત્ત્વપૂર્ણ ભાગ છે. તેનો મુખ્ય હેતુ મંગળ જેવા લાંબા અંતરિક્ષ મિશન દરમિયાન ભોજન પૂરો પાડવાનો છે.
માનવ પરીક્ષણ, મંજૂરીની રાહ
અલબત્ત, આ કૂકીઝને હજુ સુધી કોઈ માણસે ચાખ્યાં નથી અને તેના માનવ પરીક્ષણ માટે જરૂરી મંજૂરી મેળવવાની પ્રક્રિયા ચાલી રહી છે. જોકે સંશોધકો જણાવે છે કે તેની સુગંધ તો ખૂબ જ સરસ છે. વર્તમાન સમયમાં આ સ્પેસ ફૂડ તૈયાર કરવાનો ખર્ચ પ્રતિ કિલો 60 ડોલરે જેટલો આવે છે. જોકે, ભવિષ્યમાં ઉત્પાદન ખર્ચમાં નોંધપાત્ર ઘટાડો થઇ શકે છે.
