એનઆરઆઇ એરાઉન્ડ ધ વર્લ્ડ

ચાર ભારતીય અમેરિકન રિસર્ચર્સને વર્ષ 2026 માટે સ્લોન રિસર્ચ ફેલો જાહેર કરાયાં

ન્યૂયોર્કઃ ચાર ભારતીય અમેરિકન રિસર્ચર્સને વર્ષ 2026 માટે સ્લોન રિસર્ચ ફેલો જાહેર કરાયાં છે. આ ફેલોશિપ સાયન્સ, મેથ્સ અને એન્જિનિયરિંગમાં મહત્વના રિસર્ચ માટે અપાય છે. તે અંતર્ગત ચારેય ભારતીય અમેરિકનને દરેકને 75,000 ડોલર પુરસ્કાર પેટે અપાશે. આલ્ફ્રેડ પી. સ્લોન ફાઉન્ડેશન દ્વારા કાર્નેગી મેલોન યુનિવર્સિટીના આયુષ જૈન, અરુણકુમાર કુચીભોતલા અને અદિતિ રઘુનાથન તથા મેસેચ્યુસેટ્સ ઇન્સ્ટિટ્યુટ ઓફ ટેકનોલોજીના આનંદ નટરાજનને સ્લોન રિસર્ચ ફેલો જાહેર કરાયાં હતાં. 126 સ્લોન ફેલોસમાં તેમની પસંદગી દર્શાવે છે કે સાયન્સ, કોમ્પ્યુટિંગ, એઆઇ, ક્રિપ્ટોગ્રાફી અને ક્વોન્ટમ ઇન્ફર્મેશન જેવા સેક્ટરોમાં ભારતીયોનો દબદબો વધી રહ્યો છે.

000000000000000000000000

ભારતીય કેનેડિયન પદ્મા વિશ્વનાથનની બૂકર પ્રાઇઝ માટેના ભાષાંતરકાર તરીકે નિયુક્તિ

લંડનઃ ભારતીય મૂળના કેનેડિયન લેખિકા પદ્મા વિશ્વનાથનની વર્ષ 2026ના ઇન્ટરનેશનલ બૂકર પ્રાઇઝ લોન્ગલિસ્ટમાં બ્રાઝિલિયન લેખિકા એના પૌલા માઇયા દ્વારા લિખિત પોર્ટુગિઝ નવલકથા ઓન અર્થ એઝ ઇટ ઇઝ બિનિથના અંગ્રેજી ભાષાંતરકાર તરીકે નિયુક્તિ કરાઇ છે. બૂકર પ્રાઇઝ માટે આ  વર્ષે કુલ 13 એન્ટ્રી મળી છે. 50,000 પાઉન્ડનું બૂકર પ્રાઇઝ સમાન રીતે તેના લેખક અને ભાષાંતરકાર વચ્ચે વહેંચવામાં આવે છે. ગયા વર્ષે કન્નડ લેખિકા બાનુ મુસ્તાક અને તેમના ભાષાંતરકાર દીપા ભસ્તી વચ્ચે આ પ્રાઇઝ વહેંચવામાં આવ્યું હતું.

000000000000000000000000

ટેક્સાસના ઓસ્ટિનમાં માસ શૂટિંગમાં ભારતીય અમેરિકન સ્ટુડન્ટનું મોત

ટેક્સાસઃ ટેક્સાસના ઓસ્ટિનમાં થયેલા માસ શૂટિંગમાં 21 વર્ષીય ભારતીય અમેરિકન સ્ટુડન્ટ સવિથા શાનનું મોત થયું હતું. પોલીસ આ ઘટનાની આતંકવાદી હુમલા તરીકે તપાસ કરી રહી છે. હુમલો કરનાર વ્યક્તિને પોલીસે ઠાર માર્યો હતો. અહેવાલો પ્રમાણે આ હુમલામાં 3 લોકોના મોત થયાં હતાં અ ડઝન કરતાં વધુ લોકોને ઇજા પહોંચી હતી. ગયા રવિવારે 53 વર્ષીય ડિયાગા ડિયાગ્ને નામના શૂટરે ઓસ્ટિનના એક ભરચક બારમાં અંધાધૂંધ ગોળીબાર કર્યા હતા. તેના કપડાની ડિઝાઇન ઇરાનના ધ્વજ જેવી હતી અને તેના પર પ્રોપર્ટી ઓફ અલ્લાહ એવા શબ્દો લખેલાં હતાં.

000000000000000000000000

કેન્ટુકીમાં બાળકો પર ટીવીનું રિમોટ ફેંકનાર ગુજરાતી પિતાની ધરપકડ

કેન્ટુકીઃ કેન્ટુકીના એલિઝાબેથ ટાઉનમાં રહેતા બ્રિજેશ પટેલ નામના એક ગુજરાતીની ફેબ્રુઆરી 17ના રોજ ધરપકડ કરવામાં આવી હતી, તેના પર પોતાના ઘરમાં બાળકો સાથે દુર્વ્યવહાર કરવાનો આરોપ છે, આ મામલે આરોપી પર ફોર્થ ડિગ્રી અસોલ્ટ ચાર્જ લગાવવામાં આવ્યો છે. એલિઝાબેથટાઉન પોલીસ ડિપાર્ટમેન્ટના ઓફિસર્સને બ્રિજેશ પટેલના ઘરમાં ઝગડો થયો હોવાનો ફોન કોલ મળતાં એક ટીમ ત્યાં પહોંચી હતી. પોલીસ આરોપીના ઘરે ગઈ ત્યારે બે બાળકો ત્યાં હાજર હતા જે ઘણા અપસેટ લાગી રહ્યા હતા, બાળકોએ પોલીસને એવું જણાવ્યું હતું કે તેમના પિતાએ તેમની સાથે અયોગ્ય વ્યવહાર કર્યો છે. અરેસ્ટ ડોક્યુમેન્ટમાં દર્શાવાયેલી વિગતો અનુસાર પોલીસ બ્રિજેશ પટેલના ઘરે પહોંચી ત્યારે બ્રિજેશ પટેલ નશાની હાલતમાં હોય તેવું લાગ્યું હતું. પોલીસ રિપોર્ટમાં જણાવાયું છે કે બાળકોએ પોલીસને એવું કહ્યું હતું કે ટીવીનું રિમોટ કામ ના કરતું હોવાથી બ્રિજેશ પટેલને ગુસ્સો આવી ગયો હતો અને તેમણે રિમોટ બાળકો તરફ ફેંક્યું હતું અને સાથે જ તેમના તરફ જૂતું પણ ફેંકવામાં આવ્યું હતું.

000000000000000000000000

કેલિફોર્નિયામાં ગુરુદ્વારાના સેવાદારનું અપહરણ અને હત્યા

કેલિફોર્નિયાઃ અમેરિકાના કેલિફોર્નિયામાં 57 વર્ષીય ગુરુદ્વારાના સ્વયંસેવક અવતાર સિંહનું અપહરણ કરી હત્યા કરી નાખવામાં આવી હતી. અવતાર સિંહ લાંબા સમયથી ટ્રેસી ખાતે આવેલા ગુરુદ્વારામાં સેવાદાર તરીકે સેવા આપી રહ્યા હતા. 17 ફેબ્રુઆરીથી તેઓ લાપતા હતા. આરોપ છે કે તે દિવસે બપોરે જ ગુરુદ્વારા  પરિસરમાંથી તેમનું અપહરણ કરાયું હતું. 3 દિવસ બાદ નાપા કાઉન્ટીમાં લેક બેરિસ્સા નજીકથી અવતાર સિંહનો મૃતદેહ મળી આવ્યો હતો. સાન જોકિન કાઉન્ટીના શેરિફ પેટ્રિક વિથરોના જણાવ્યા અનુસાર અપહરણકર્તાઓનો ટાર્ગેટ અવતાર સિંહ નહોતા. અમે આ મામલાની ઊંડાણપુર્વક તપાસ કરી રહ્યાં છીએ.

000000000000000000000000

પાર્સલ કાંડઃ માલાણી જ્વેલર્સમાંથી 100 મિલિયન ડોલરનું સોનુ જપ્ત

ટેક્સાસઃ 29 જાન્યુઆરીના રોજ ટેક્સાસના અરવિંગમાં ગુજરાતીની માલિકીના તિલક જ્વેલર્સ પરના દરોડા બાદ આ કૌભાંડની તપાસમાં અન્ય સ્ટેટ્સમાં આવેલા વધુ 3 સ્ટોર્સ પર ફેડરલ એજન્સી દ્વારા દરોડા પાડી લાખો ડોલરનું સોનુ જપ્ત કરાયું છે. સીનિયર સિટિઝન્સ સાથે ઠગાઇ કરી પડાવી લેવાયેલા 70 મિલિયન ડોલરના સોનાના વહીવટમાં આ જ્વેલરી સ્ટોર્સ સામેલ હોવાનો ઓથોરિટીનો દાવો છે. બુધવારે જ્યોર્જિયા ડિકેટર સ્થિત માલાણી જ્વેલર્સ પર દરોડો પડાયો હતો. તે ઉપરાંત ટેક્સાસના રિચર્ડસન અને ફ્લોરિડાના ઓર્લાન્ડોમાં પણ દરોડાની કાર્યવાહી કરાઇ હતી. માલાણી જ્વેલર્સના બે શોરૂમ્સ પર પડેલી રેડમાં અત્યારસુધીમાં 100 મિલિયન ડોલરનું ગોલ્ડ જપ્ત કરવામાં આવ્યું હોવાનું ટેક્સસની કોલિન કાઉન્ટી શેરિફ ઓફિસે જણાવ્યું છે.

000000000000000000000000

ફ્લોરિડામાં 3 લાખ ડોલરની લોટરીની ટિકિટ ચોરવાના આરોપસર ભારતીયની ધરપકડ

ફ્લોરિડાઃ ફ્લોરિડાના એક કન્વેનિયન્સ સ્ટોરમાં કામ કરતા ભારતીય રાકેશ તંગુતુરીની 3 લાખ ડોલરની લોટરીની ટિકિટ ચોરવાના આરોપસર ધરપકડ કરાઇ છે. 34 વર્ષીય રાકેશ માયામી નજીકના લિટલ હૈતી વિસ્તારમાં આવેલા સ્ટોરમાં કામ કરતો હતો. તા પર 50,000 ડોલરનું ફ્રોડ આચરવાની સાથે ગ્રાન્ડ થેફ્ટનો આરોપ મૂકાયો છે. રાકેશ જ્યાં કામ કરતો હતો તેના ઓનરને ગયા મહિને સ્ક્રેચ ઓફ ટિકિટ બુક્સની ચોરી થઈ હોવાની જાણ થઈ હતી અને તેને પોતાના એમ્પ્લોઈ પર શંકા ગઈ હતી. આ ઉપરાંત રાકેશે લોટરીને લગતા ટ્રાન્ઝેક્શન્સ કરીને સ્ટોરના બેન્ક અકાઉન્ટમાંથી પણ હજારો ડોલરની ગોલમાલ કરી હતી. ઓનર પોલીસને જાણ કરી દેશે તો પોતે ફસાઈ જશે તેવો ડર લાગતા રાકેશે એક મેસેજ મોકલીને પોતે જ ચોરી કરી હોવાની કબૂલાત કરી હતી તેમજ ફ્લોરિડા લોટરી ઈન્વેસ્ટિગેર સામે પણ તેણે પોતાનો ગુનો કબૂલ્યો હતો.

000000000000000000000000

શિકાગોમાં ICE દ્વારા ધરપકડ કરાયેલા મહેસાણાના યુવકનો જેલમાંથી છૂટકારો

શિકાગોઃ અમેરિકામાં રહેતા અનડોક્યુમેન્ટેડ ગુજરાતીઓ હાલ ICEથી ફફડી રહ્યા છે તેવામાં 2025ના અંતમાં શિકાગો એરપોર્ટના પાર્કિંગ લોટમાંથી અરેસ્ટ કરવામાં આવેલા એક ગુજરાતી કેબ ડ્રાઈવરનો તાજેતરમાં જ જેલમાંથી છૂટકારો થયો છે. શિકાગોમાં ડિસેમ્બર 2025માં બોર્ડર પેટ્રોલે એરપોર્ટ પરથી મોટાપાયે કેબ ડ્રાઈવર્સની ધરપકડ કરી હતી અને તે વખતે થયેલી કાર્યવાહીમાં મહેસાણા જિલ્લાનો આ ગુજરાતી યુવક પણ હાથમાં આવી ગયો હતો.ત્રણેક વર્ષ પહેલા ફેમિલી સાથે અમેરિકા ગયેલા ત્રીસેક વર્ષના આ યુવકનો કોઈ ક્રાઈમ રેકોર્ડ નહોતો તેમજ તેનો અસાયલમનો કેસ પેન્ડિંગ હતો અને સાથે જ વર્ક પરમિટ પણ હતી. યુવકે જણાવ્યું હતું કે શિકાગોમાં અરેસ્ટ કરાયાના ગણતરીના કલાકોમાં જ તેને કન્ટકીની જેલમાં મોકલી દેવાયો હતો. આ જેલમાં તેને અમુક પંજાબીઓનો પણ ભેટો થયો હતો જેમાંથી ઘણા લોકોને ડિપોર્ટ કરવામાં આવ્યા હતા.

000000000000000000000000

પાર્સલ કાંડઃ કેન્ટુકીના કલ્પેશ પટેલને એફબીઆઇએ વોન્ટેડ જાહેર કર્યો

કેન્ટુકીઃ અમેરિકાની એજન્સી એફબીઆઇ દ્વારા કેન્ટુકીના કલ્પેશ ઉર્ફે કેની પટેલ નામના 35 વર્ષના આ યુવક સામે જૂન 2023માં ફેડરલ અરેસ્ટ વોરન્ટ નીકળ્યું હતું પરંતુ ત્યારથી જ તે ગાયબ છે. તે અમેરિકામાં જ છે કે પછી મોટું કૌભાંડ કરીને બીજા કોઈ દેશમાં નાસી છૂટ્યો છે તે અંગે પણ FBI અંધારામાં છે, કેની ઈલીનોય અને પેન્સિલવેનિયાની વચ્ચે ક્યાંક રહેતો હોવાની આશંકા છે. FBIનું કહેવું છે કે કેની પટેલ પાર્સલ કાંડમાં મોટાપાયે સંડોવણી ધરાવતો હતો અને તેણે 2017થી 2021ના ગાળામાં ખૂબ જ મોટી રકમના હવાલા કર્યા છે. લાખો ડોલરનો કાંડ કરીને અંડરગ્રાઉન્ડ થઈ ગયેલો કલ્પેશ અમેરિકામાં ઈલીગલી રહેતો હતો કે કેમ તેની કોઈ ચોખવટ કરવામાં નથી આવી. FBIએ તેની જે વિગતો પૂરી પાડી છે તેમાં માત્ર એટલું જ જણાવાયું છે કે તે ઈન્ડિયન સિટીઝન છે, પાંચ ફુટ નવ ઈંચ હાઈટ ધરાવે છે તેમજ અમેરિકામાં તે ગેસ સ્ટેશન પર કેશિયર તરીકે કામ કરતો હતો.

000000000000000000000000