ઓટ્ટાવાઃ કેનેડા સરકારે એક નવું નાગરિકતા બિલ C-3 રજૂ કર્યું છે, જે વિદેશમાં જન્મેલા કેનેડિયન નાગરિકોને તેમના સંતાનોને નાગરિકતા મેળવવાની મંજૂરી આપશે. વર્તમાન કાયદામાં આ અધિકાર ફક્ત પ્રથમ પેઢી સુધી મર્યાદિત હતો. એટલે કે, જો કેનેડિયન નાગરિક વિદેશમાં જન્મે છે, તો તે તેના બાળકને (જે વિદેશમાં જન્મ્યો હતો) નાગરિકતા આપી શકતો ન હતો. નવી સિસ્ટમમાં હવે આ શરત દૂર કરાઇ છે, પરંતુ આ માટે માતાપિતાએ કેનેડા સાથે ‘મજબૂત જોડાણ’ દર્શાવવું પડશે. આનો અર્થ એ છે કે બાળકના જન્મ અથવા દત્તક લેતા પહેલા માતાપિતાએ ઓછામાં ઓછા 1,095 દિવસ (ત્રણ વર્ષ) કેનેડામાં રહેવું પડશે. હવે આ બિલને સંસદના બંને ગૃહો દ્વારા પસાર કરીને કાયદો બનવા માટે મંજૂરી મેળવવી પડશે.
