વાનકુંવરઃ કેનેડાના બ્રિટિશ કોલંબિયા પ્રાંતના ટમ્બલર રિજ સેકન્ડરી સ્કૂલમાં ગોળીબારની હિચકારી ઘટનામાં હુમલાખોર સહિત 10 લોકોના મોત થયા હતા જ્યારે 27 લોકો ઘાયલ થયા છે. રોયલ કેનેડિયન માઉન્ટેડ પોલીસ (આરસીએમપી) અનુસાર, 6 મૃતદેહ સ્કૂલની અંદરથી મળ્યા, બે નજીકના ઘરમાંથી જ્યારે એક વ્યક્તિએ હોસ્પિટલ લઈ જતી વખતે દમ તોડયો. બે ઘાયલની હાલત ગંભીર છે. પોલીસના જણાવ્યા મુજબ સંદિગ્ધ હુમલાખોર એક મહિલા હતી અને તે સ્કૂલની અંદર મૃત હાલતમાં મળી આવી. અધિકારીઓએ તેની ઓળખ અને હથિયાર સંબંધિત વિગતો જાહેર કરી નથી. પોલીસના જણાવ્યા મુજબ હવે કોઈ અન્ય સંદિગ્ધ નથી અને લોકોને કોઈ જોખમ નથી. જોકે, આ સ્કૂલને એક અઠવાડિયા માટે બંધ કરી દેવામાં આવી હતી.
