કોપનહેગનઃ ડેન્માર્કના વતની મોર્બન પેડરસને એક એવો અનોખો વિક્રમ પોતાના નામે નોંધાવ્યો છે જે આ દુનિયામાં ખૂબ જ ઓછા લોકો કરી શક્યા છે. તેમણે એક પણ વખત વિમાન પ્રવાસ એટલે કે હવાઈ મુસાફરી કર્યા વગર જ પૃથ્વીના લગભગ તમામ દેશોની સફર પૂરી કરી છે. તેમની આ રોમાંચક અને પડકારોથી ભરેલી યાત્રા સળંગ 10 વર્ષ સુધી ચાલી હતી.
પેડરસન તેમની આ ઐતિહાસિક સફર દરમિયાન ટ્રેન, બસ, કાર, દરિયાઈ જહાજ અને ઘણી જગ્યાએ પગપાળા ચાલીને 195થી વધુ દેશમાં પહોંચ્યા હતા. વર્ષ 2013માં શરૂ કરેલી આ ઐતિહાસિક સફર તેમણે 2023માં માલદીવ્સ પહોંચીને આ લાંબી યાત્રા સફળતાપૂર્વક પૂરી કરી હતી. આ પ્રવાસ દરમિયાન તેમણે પોતાના અનુભવોને ‘વન્સ અપોન એ સાગા’ નામથી સોશિયલ મીડિયા પર શેર કર્યા હતા, જેને દુનિયાભરના લાખો લોકોએ પસંદ કર્યા છે.
પેડરસના જણાવ્યા મુજબ, આ પ્રવાસ પાછળ રોજનો ખર્ચ લગભગ 20 ડોલર (અંદાજે 1600 રૂપિયા) થતો હતો, જે તેમણે ફંડિંગ અને સ્પોન્સરશિપ દ્વારા મેળવ્યો હતો. અલગ-અલગ દેશોના લોકો વિશે વાત કરતા તેમણે કહ્યું કે, મીડિયામાં ગમે તે બતાવવામાં આવતું હોય, પરંતુ વાસ્તવિકતામાં દુનિયાભરના લોકો ખૂબ જ દયાળુ અને મદદગાર છે.
એક દસકા લાંબો પડકારજનક પ્રવાસ
મોર્બન પેડરસને પોતાની આ અનોખી અને ઐતિહાસિક યાત્રા માટે ત્રણ કડક નિયમો બનાવ્યા હતા. એક તો, તેઓ કોઈ પણ સંજોગોમાં વિમાન પ્રવાસ કરશે નહીં. બીજું, દરેક દેશમાં ઓછામાં ઓછા 24 કલાકનું રોકાણ તો કરશે જ અને ત્રીજું, જ્યાં સુધી છેલ્લો દેશ બાકી હશે ત્યાં સુધી તેઓ પોતાના ઘરે પાછા પણ ફરશે નહીં. 10 વર્ષની આ સફર દરમિયાન પેન્ડરસનને વિઝાની સમસ્યાથી લઇને, રાજકીય અસ્થિરતા, સરહદી નિયમો અને કોવિડ-19 મહામારી જેવા નાના-મોટા અનેક પડકારોનો સામનો કરવો પડ્યો હતો, જોકે તેઓ હિંમત હાર્યા નહોતા. કોવિડ મહામારી દરમિયાન તો તેઓ લગભગ બે વર્ષ સુધી હોંગકોંગમાં ફસાઈ ગયા હતા, જેના કારણે તેમની આ યાત્રા વધુ લાંબી થઈ ગઈ હતી. હાલમાં તેઓ ડેનમાર્ક પરત ફરીને લેખક અને મોટિવેશનલ સ્પીકર તરીકે કામ કરી રહ્યા છે.
