ભારતને FATFમાંથી હટાવવા પાક.ની માગ

ઇસ્લામાબાદઃ પાકિસ્તાને આંતરરાષ્ટ્રીય આતંકવાદ માટે ભંડોળ પૂરું પાડનારાઓ પર નજર રાખતી સંસ્થા ફાયનાન્સિયલ એકશન ટાસ્ક ફોર્સ (એફએટીએફ)ને અનુરોધ કર્યો છે કે ભારતને સંસ્થાના એશિયા પેસિફિક સંયુક્ત જૂથના સહ-અધ્યક્ષપદેથી હટાવવું જોઇએ. પાકિસ્તાનનું કહેવું છે કે ભારત સહ-અધ્યક્ષ હશે તો પાકિસ્તાન અંગે નિષ્પક્ષ સમીક્ષા નહીં થઈ શકે. તાજેતરમાં પેરિસમાં સંસ્થાની બેઠકમાં પાકિસ્તાનને વોચલિસ્ટમાં યથાવત્ રખાયું છે. પાકિસ્તાન એશિયા-પેસિફિક જૂથનું સભ્ય છે. પાકિસ્તાનના નાણા પ્રધાન અસદ ઉમરે સંસ્થાને મોકલેલા એક પત્રમાં ભારત સિવાયના કોઈ સભ્ય દેશને એશિયા-પેસિફિક જૂથના સહ-અધ્યક્ષપદે નિયુક્ત કરવા કહ્યું છે, જેથી પારદર્શી સમીક્ષા થઈ શકે.