નવી દિલ્હી: કોઈપણ સામાન્ય માનવી માટે આહારવિહાર અને શ્વાસ લેવા જેટલી જ આવશ્યક છે પૂરતી ઊંઘ. અનેક વૈજ્ઞાનિક અભ્યાસોમાં આ વાત પુરવાર પણ થઇ છે. જોકે વિશ્વમાં એક વ્યક્તિ એવી પણ છે જે 62 વર્ષથી ઊંઘી જ નથી.
આ વ્યક્તિનું નામ છે થાઈ નગોક અને તે વિયેતનામનો છે. અહેવાલ મુજબ તે છેલ્લાં 62 વર્ષથી ઊંઘ્યા નથી. 81વર્ષના નગોકનો દાવો છે કે 1962માં આવેલા તાવ બાદ તેને આ તકલીફ શરૂ થઇ છે. તે સમયે સારવાર કરતાં તાવ તો ઉતરી ગયો હતો, પરંતુ પછી તે એક પળ માટે સૂઈ શક્યા નથી. તેમને ગાઢ ઊંઘ તો ઠીક પણ ઝોકું સુદ્ધા આવતું નથી. તેમની આ દુર્લભ બીમારીને જોઈને ડોક્ટર પણ હેરાનપરેશાન છે. નગોકને તેના ગામના લોકો મજાકમાં ‘ગામના વગર પગારના ચોકીદાર’ તરીકે પણ ઓળખાવે છે. નગોક સતત જાગતા હોવાના કારણે ત્યાં કોઈ ચોરી કરવા આવવાની હિંમત કરતું નથી.
નગોક 60 વર્ષ કરતાં વધારે સમયથી જાગે છે એવું નથી તે ખેતીના કામમાં મદદ પણ કરી રહ્યા છે. કોઈએ તેમને ઊંઘતા જોયા જ નથી. અહેવાલ મજબ 1942માં વિયેતનામમાં ક્વાંગ નામના પ્રાંતના એક નાના ગામમાં જન્મેલા નગોકને વિયેતનામ યુદ્ધ દરમિયાન 21 વર્ષની વયે ભારે તાવ આવ્યો અને તે માંદા પડયા. તેના પછી તેને તાવ તો ઉતરી ગયો, પરંતુ તેની ઊંઘ ક્યારેય પરત ન આવી. નગોકે જણાવ્યું હતું કે તેણે ઊંઘવા માટે એકાદ-બે નહીં, કેટલાય પ્રયત્નો અને ઉપચારો કર્યા છે, પરંતુ આજ દિવસ સુધી તે ઝોકું પણ ખાઇ શક્યા નથી.
